Kanta 47 - Hanunuu

Kanta 47 Ti Diyus ti Hari sa Buu Kalibutan

Ti “maskil” ngatay tula, ti isinurat manga anak ni Kura para sa manugpanguna sa magkanta.

¹ Tanan pag manga nasyun, pagpalakpak kamu ag paghuyaw sa Diyus dahil sa kabayaan.

² Kagalang-galang gid ti Panginuun, ti Kaabwat-abwatan pag Diyus. Makamaskihan siya pag hari sa buu kalibutan.

³ Pag-ipasirung niya sa kanta, sa manga Israilita, ti manga nasyun.

⁴ Pinili niya para sa kanmi ti daga nimi maranahun, ti ipinadayaw niya pagmahalun si Hakub.

⁵ Ti Diyus magdayik sa kay tukawan hari habang maghuruyawan ti manga tawu sa kabayaan ag magtunug ti manga budyung.

⁶ Pagkanta kamu manga pagdayaw sa Diyus. Pagkanta kamu manga pagdayaw sa hari nita.

⁷ Dahil ti Diyus imaw ti hari sa buu kalibutan. Dayawa niyu siya sa panab-anan manga kanta.

⁸ Matukawan siya sa kay banal pag tukawan hari maghari sa manga nasyun.

⁹ Nagtiripun ti manga takinan manga nasyun kaibahan sa nasakupan Diyus ni Abraham. Dahil ti manga takinan sa kalibutan Diyus ti may apu. Pagdayawun gid siya.