Kanta 46 - Hanunuu

Kanta 46 Kaibahan Nita ti Diyus

Ti “maskil” ngatay tula, ti isinurat manga anak ni Kura para sa manugpanguna sa magkanta. Kantahun niyu inda sa abwat pag tunu.

¹ Ti Diyus imaw ti mag-alaga ag magpakaun sa kanta kabisugan. Alistu gid siya pirmi mag-awat sa udas kakurian.

² Nakan danga kita magkadala una waya matandug ti daga ag mapugdak ti manga bantud ag magkaralagpak sa kalalawdan dagat,

³ una waya pumaywas ag humumbak ti dagat, bag-u magkaratandug ti manga bantud.

⁴ May sapa magpakaun kabayaan sa banwa Diyus, ti banal pag ulian Kaabwat-abwatan pag Diyus.

⁵ Ti Diyus mag-uli sa inda pag banwa; nakan balaw inda midamhak. Maaga waya rumas-ug ti Diyus umawat siyun pag banwa.

⁶ Magkagulu ti manga nasyun; magkatandug ti manga kaharian. Sa ringgit Diyus ga matunas sa kadalaan ti manga tawu sa kalibutan.

⁷ Ti Panginuun Makamaskihan kaibahan nita. Ti Diyus ni Hakub imaw kanta darangpan.

⁸ Abala, bantayi ti manga buwat Panginuun, ti makadululaw pag manga bagay kay binuwat sa kalibutan.

⁹ Pag-amparahun niya ti manga girahan sa buu kalibutan. Pagpamariun niya ti manga pamana ag manga bangkaw, ag pag-irubun ti manga panangga.

¹⁰ Magkun siya, “Apasi yi niyu ti paggira. Ag kilalan-a niyu aku ti Diyus. Kamu pag manga nasyun sa buu kalibutan dumayaw sa kangku.”

¹¹ Ti Panginuun Makamaskihan kaibahan nita. Ti Diyus ni Hakub imaw kanta darangpan.