Kanta 45 - Hanunuu

Kanta 45 Ti Pamasaruhan Hari

Ti “maskil” ngatay tula manga anak ni Kura para sa manugpanguna sa magkanta. Kanta para sa pamasaruhan. Pagkantahun inda sa tunu kanta “Manga Liryu”.

¹ Kang tagipusuun napunu marinu pag manga bagaw habang pagbagawun niku kang sarabihun sa hari. Kang kakayahan sa pagbagaw parihu sa kakayahan usa ka mayad pag manugsurat.

² Mahal Hari, kawu ti pinakamarinu sa tanan pag manga lalaki, ag magbagaw kawu manga bagaw ikamayad sa iba, dahil pagpapaladan kawu pirmi Diyus.

³ Sabakan kanmu baladaw, makapangyarihan pag hari; makamaskihan kawu ag paggalangun.

⁴ Pakakitan kanmu kadayawan, paggira kawu marapanalu para sa katutuuhanan ag sa katadlungan manga pag-apihun. Sa panab-anan nimu kapangyarihan pagbuwat kawu makadululaw pag manga buwat.

⁵ Biyagi nimu matarum pag manga pamana ti manga tagipusuun nimu manga kalaban. Pumasakup ti manga nasyun sa kanmu.

⁶ Kanmu kaharian, Diyus, balaw gid may katapusan, ag matadlung kanmu magpanguna sa kanmu kaharian.

⁷ Magkaibug kawu sa matadlung, dapat magkadaut kawu sa kadautan. Nakan pinili kawu Diyus, nimu Diyus, ag pinakan-an kabayaan labaw man kaysa ipinakaun niya sa kanmu manga kaibahan.

⁸ Kanmu rutay mabanglu pamanglu mira, aluwi ag kasya. Pagpasulungun kawu tunug manga pamatunug sa kanmu balay hari may magsinglaw pag pamarinu.

⁹ Ti iba sa kanmu paggalangun pag manga babayi anak manga hari. Sa kanmu sikun kamang matindugan kanmu rayna may sulung unu lunsay gid gintu ginan sa Upir.

¹⁰ Aguman hari, patingihi kang sabihun: Kalimti kanmu manga kasimanwa ag manga katawuhan,

¹¹ dahil naibug ti hari sa kanmu rinu. Galanga siya dahil siya kanmu amu.

¹² Ti manga mag-uli sa Tiru hanggan ti manga pinakamayaman sa kanda mandara manga pamakaun sa kanmu hampay mayad kawu sa kanda.

¹³ Pagkarinu kawu sa sulud nimu sulud-sulud. Kanmu rutay may burda gintu.

¹⁴ Masulungan kanmu marinu pag rutay, darahun kawu atag sa hari. Ag ti dinara sa kanmu pag manga daraga sumunud sa kanmu, kanmu manga abay.

¹⁵ Magbaya gid kamu habang magsulud kamu sa balay hari.

¹⁶ Mahal Hari, kanmu linahi pag manga lalaki bumaliw manga hari diman parihu sa kanda manga ginurang. Buwatun nimu sida manga takinan sa buu daga.

¹⁷ Ipaalaala niku kawu sa tanan pag sinulput. Nakan dayawun kawu manga nasyun tugka aban.