Kanta 44 - Hanunuu

Kanta 44 Darangin hampay Iribri Diyus

Ti “maskil” ngatay tula manga anak ni Kura para sa manugpanguna sa magkanta.

¹ Diyus, nasaydan nimi ti itinultul nimi manga ginurang tungkul sa kanmu manga binwat sa kanda kaudasan, kaybi waya pag timpu.

² Pinaighit nimu ti manga tawu balaw magsunud sa kanmu ag kanmi manga ginurang imaw ti ipinatahan nimu sa kanda manga rugar. Pinakurianan nimu tunda pag manga tawu dapat pinaabunda nimu kanmi manga ginurang.

³ Dapat ti tutuu, balaw dahil sa armas ag kabisugan nimi manga ginurang nagmarapanalu sida ag naapu nida ti daga, nu unman dahil sa kanmu kapangyarihan, kabisugan, ag pangaawa, dahil pagmahalun nimu sida.

⁴ Kawu kang Diyus ag Hari magpakaun panalu sa kanmi manga linahi ni Hakub.

⁵ Sa panab-anan nimu matalu nimi kanmi manga kalaban.

⁶ Balaw aku magsarig sa kang pamana ngatay baladaw makapanalu sa kangku.

⁷ Dahil kawu ti magpapanalu sa kanmi laban sa kanmi manga kalaban. Pagpakay-ahun nimu ti manga maglaban sa kanmi.

⁸ Ipadayaw kawu nimi pirmi, Diyus, ag dayawun nimi sa unman may katapusan.

⁹ Dapat kainda, binugyahan yi nimu kami ag pinaababa. Balaw yi nimu pag-ibahan kanmi manga sundalu.

¹⁰ Ipinapalagiw nimu kami sa kanmi manga kalaban. Ag pinanbuul nida kanmi manga kasiyunan.

¹¹ Ipinahintulut nimu magkaramatay kami parihu sa manga karanidu pinangiyaw. Ag pinanwayak nimu kami sa manga nasyun.

¹² Kami kanmu nasakupan ipinabili nimu sa baratu. Ga parihu lang kami sa unman may pulus sa kanmu.

¹³ Binwat nimu kami makakaray-a ag karasarin-an manga kaarani nimi manga nasyun.

¹⁴ May manga kabagawan waya sida magpuya sa kanmi, ag mag-il-ilung sida magsurug sa kanmi.

¹⁵ Pirmi lang aku pagpakay-ahun. Ag balaw yi aku may uyahun isarangu,

¹⁶ dahil sa manga pagsabihun manga magpakay-a ag magsurug sa kangku pag manga kalaban niku magkaibug manbalus sa kangku.

¹⁷ Nangyari inda tanan sa kanmi una waya balaw kami magkalimut sa kanmu, ngatay maglabag sa kanmu taratu.

¹⁸ Balaw kami magpatlikud sa kanmu ag balaw kami magsibrak sa kanmu palakaw.

¹⁹ Dapat rinunut nimu kami ag pinabay-anan sa madulum gid pag rugar nu naan pag mag-uli ti simarun idu.

²⁰ Nu nalimtan yi nimi kawu, Diyus, ag magdarangin kami sa tuhay pag manga diyus,

²¹ balaw aw nguna nimu inda magkaalaman, bati alam diman nimu ti manga lihim sa kaisipan tawu?

²² Dapat dahil sa kanmi pagsunud sa kanmu, asan kami pirmi sa kadilikaduhan sa kamatayan. Parihu kami sa manga karanidu pag-iyawun.

²³ Panginuun, awati yi kami! Danga kami pagbugyahi hanggan aban.

²⁴ Hayga magpatagu kawu sa kanmi, pagkalimtan nimu kanmi mag-agwanta hanggan ti pag-api-api sa kanmi?

²⁵ Nagkaragpu kami sa daga ag udyi makabangun.

²⁶ Awati kami, ribrihan kami dahil sa kanmu pagmahal sa kanmi.