Kanta 43 - Hanunuu

Kanta 43 Darangin sa Udas Kakurian

¹ Diyus, patutuuhani unman aku may kasalanan, ag apini aku laban sa manga balaw maka-diyus pag manga tawu. Ribrihan aku sa madaya ag magbuwat daut pag manga tawu.

² Kawu, Diyus, kang marig-un pag darangpan. Hayga binugyahan nimu aku? Hayga kailangan waya manruku aku dahil sa pagpangapi manga kalaban sa kangku?

³ Paanyui aku ag tudlui nimu katutuuhanan hampay magiyahan aku pabalik sa kanmu Balay ati sa banal pag bantud.

⁴ Bag-u makapakarani aku sa kanmu harandugan, Diyus, kawu tigpakaun sa kangku kabayaan. Magdayaw aku sa kanmu, Diyus niku, sa panab-anan pagpatnug alpa.

⁵ Hayga lugud magkaruku ag magkataranta gid aku? Kailangan magsarig aku sa kanmu. Hu, dayawun maan niku kawu, kawu kang Diyus ag manugribri.