Kanta 42 - Hanunuu

Kanta 42 Ti Hingbut Tawu Makapakarani sa Atubangan Diyus

Ti “maskil” ngatay tula manga anak ni Kura para sa manugpanguna sa magkanta.

¹ Diyus, maghanap aku sa kanmu, parihu sa karasyaw maghanap danum sa sapa.

² Buhi pag Diyus, magkauwaw aku sa kanmu. Kapira waya aku makaatag sa kanmu Balay hampay makapakarani sa kanmu atubangan?

³ Sirang yabi pirmi aku maglumi ag harus mainum yi niku kang manga luwa habang magpakabagaw ti manga tawu sa kangku kuntay, “Naan yi lugud kanmu Diyus?”

⁴ Mag-alangan kang buut nu magkaimatun-an niku kaybi pagpangunahan niku ti mayamu pag manga tawu atag sa kanmu Balay. ag magdaus kami may huruyawan sa kabayaan ag pagpasalamat sa kanmu.

⁵ Hayga lugud magkaruku ag magkataranta gid aku? Kailangan magsarig aku sa kanmu. Hu, dayawun maan niku kawu, kawu kang Diyus ag manugribri.

^6-7 Nagruku gid aku; ga pagtabunan aku nimu manga humbak magdagmuk parihu sa magpaywas pag kawasan. Nakan pag-alalahanun niku kawu sitay sa babaw daga Hurdan ag Hirmun, sa Bantud Misar.

⁸ Nu sirang pag-ipakakit nimu kanmu pagmahal, Panginuun, nakan nu yabi magkanta aku bilang darangin sa kanmu, Diyus niku buhi.

⁹ Diyus kang palalan-iban pag batu, magkun aku sa kanmu, “Hayga pagkalimtan nimu aku? Hayga kailangan waya manruku aku dahil sa pagpangapi manga kalaban sa kangku?”

¹⁰ Bilang ga sa magkarunut kang manga but-ul dahil sa pagpakay-a sa kangku niku manga kalaban. Magpakabagaw sida sa kangku, “Naan yi lugud kanmu Diyus?”

¹¹ Hayga lugud magkaruku ag magkataranta gid aku? Dapat magsarig aku sa kanmu ag dayawun maan niku kawu, kawu kang Diyus ag manugribri.