Kanta 41 - Hanunuu

Kanta 41 Ti Darangin Tawu may Sakit

Kanta ni Dabid para sa manugpanguna sa magkanta.

¹ Mapalad ti tawu magpasunaid sa manga pugri. Awatan siya Panginuun sa udas kakurian.

² Baliwahan siya Panginuun ag alagaan kay buhi. Papaladan siya Panginuun sa daga Israil; balaw siya ipahintulut sa kay manga kalaban.

³ Awatan siya Panginuun nu siya may sakit; paayadun niya siya sa kay mag-adnugan.

⁴ Magkun aku, “Panginuun, kaawai aku. Paayada aku, dahil nagsalan aku sa kanmu.”

⁵ Magbagaw daut kang manga kalaban tungkul sa kangku. Magkun sida, “Kapira waya nguna siya mamatay hampay malimtan yi siya?”

⁶ Nu magsabang sida sa kangku, magpabalhingu mayad kanda turunu; dapat maaw magtipun lang sida daut pag manga tultulanun tungkul sa kangku. Ag sa pagluwas nida pag-itultul nida inda sa iba.

⁷ Ti tanan magkagalit sa kangku magrayansan laban sa kangku, ag mag-isip sida daut laban sa kangku.

⁸ Magkumun sida, “May masyadu yi siya pag durungugun, nakan balaw yi gid siya makabangun waya.”

⁹ Una kang suud kakilala, ti pagsarigan gid niku, ag magsaru sa kangku sa magkaun, nandaya sa kangku.

¹⁰ Dapat kawu, Panginuun, kaawai aku; paayada aku hampay makabalus aku sa kang manga kalaban.

¹¹ Bag-u maalaman niku magbaya kawu sa kangku, dahil unman nakatalu kang manga kalaban sa kangku.

¹² Dahil unman aku may pagbuwatun daut, pag-alagaan nimu kang buhi sa unman may katapusan.

¹³ Pagdayawun ti Panginuun, ti Diyus Israil, sa unman may katapusan. Amin! Amin!