Kanta 40 - Hanunuu

Kanta 40 Manga Kanta Pagdayaw sa Panginuun

Kanta ni Dabid para sa manugpanguna sa magkanta.

¹ Nag-alagad aku may pag-agwanta sa Panginuun, ag pinatingihan niya kang maghagad awat.

² Ga binahit lang niya aku ginan sa maganuy ag malutuk pag ukang. Ag ipinatindug niya aku sa batu hampay balaw aku maunu.

³ Tinudluan niya aku bag-u pag kanta, kanta pagdayaw sa kanya, sa kanta Diyus. Mayamu pag tawu ti kumakit inda, gumalang sida ag sumarig sa kanya.

⁴ Mapalad ti tawu magsarig sa Panginuun, ag balaw magpaawat sa manga marapadayaw magsunud sa kapudilan.

⁵ Panginuun niku Diyus, unman may makaparihu sa kanmu. Mayamu pag makadululaw manga bagay ti binwat nimu, ag mayamu kanmu gayak sa kanmi. Balaw niku inda mitultul tanan dahil masyadu mayamu.

⁶ Balaw nimu pagkaibgan ti tuhay-tuhay pag kalasi manga handug. Balaw kawu maghagad manga handug pagsunugun hanggan handug sa paglumpiyu. Bagkus ngap, binwat nimu aku matinupadun sa kanmu.

⁷ Nakan magkun aku, “Inda aku, alistu sumunud sa kanmu manga sugu angay sa nisurat sa Kasuratan tungkul sa kangku.

⁸ Diyus niku, gustu niku tupadun kanmu kagustuhan. Kanmu kasuguan paghamnuun niku sa kang tagipusuun.”

⁹ Pag-itultul niku kanmu pagribri sa kangku sa pagtiripun nimu nasakupan. Alam nimu, Panginuun, balaw aku umapas sa pagtultul inda.

¹⁰ Balaw niku pag-sadilihun kanmu pagribri sa kangku. Pag-ibarita niku kawu magribri ag masarigan. Balaw niku pag-ipaulam kanmu pagmahal hanggan kanmu pagkamatinupadun nu magtiripun kami kanmu nasakupan.

¹¹ Panginuun, danga pag-irangi kanmu pangaawa sa kangku. Mana kanmu pagmahal hanggan kanmu pagkamatinupadun mag-alaga pirmi sa kangku.

¹² Dahil pagsangputun aku mayamu pag kakurian balaw mabilang. Ga natabunan yi aku niku manga kasalanan, ag udyi aku makakit. Mas mayamu waya kang manga kasalanan kaysa kang buhuk, ag dahil siti naduraan aku kabisugan.

¹³ Panginuun, ribrihan aku! Awati aku rargu.

¹⁴ Mana ti tanan maghingbut manmatay sa kangku mangay-a ag mantalang-talang. Mana ti tanan mag-isip sa kang kadamhakan mamalalagiwan sa kay-a.

¹⁵ Mana ti manga magpuya sa kangku madulaw gid nu hayga nangay-a sida.

¹⁶ Dapat mana ti tanan magdangup sa kanmu makabaya gid dahil sa kanmu. Mana ti manga magbaya sa karibrihan ginan sa kanmu sumabi pirmi, “Pagdayawun ti Panginuun!”

¹⁷ Nu tungkul sa kangku, makuri ag pugri aku. Mana alalahanun nimu aku, Panginuun. Kawu kang manug-awat ag manugribri. Diyus niku, awati aku rargu.