Kanta 4 - Hanunuu

Kanta 4 Darangin sa Yabi

Kanta ni Dabid para sa manugpanguna sa magkanta: Gamita ti manga pamatunug may bakyang.

¹ Diyus kang manug-apin, awati aku nu magdangup sa kanmu. Kabay inawatan nimu aku sa kang manga kakurian? Nakan taynguna, patingihi kang manga darangin ag kaawai aku.

² Kamu pag manga maglaban sa kangku, kapira waya nguna pag umapas kanyu magpuya sa kang pagkatawu? Kapira waya nguna kamu pag umapas sa kanyu magmahal sa manga bagay unman may pulus hanggan magparargu sa kapudilan?

³ Alalahana niyu, pinili Panginuun ti manga maka-diyus para sa kanya. Nakan ngani patingihan niya aku nu magdangup sa kanya.

⁴ Nu magkaisug kamu, danga kamu magkasala. Pagmabuut kanyu naisipan ag pag-isip-isip habang mahuwayan kamu.

⁵ Pagsarig kamu sa Panginuun ag paghandug sa kanya kang-ud pag manga handug.

⁶ Mayamu ti magsabi, “Si unu duy ti manpapalad sa kanmi?” Panginuun, kaawai duy nimu kami!

⁷ Pinakan-an nimu aku kabayaan, subra waya sa kabayaan manga tawu may abunda pag uyas hanggan irinmun ubas.

⁸ Nakan nu magkaturug aku unman may pagkadalaan, dahil pagbantayan nimu aku, Panginuun.