Kanta 39 - Hanunuu

Kanta 39 Ti Pagtultul Kasalanan Tawu Magkakurian

Kanta ni Dabid para sa manugpanguna sa magkanta sa kan Hidutun.

¹ Magkun aku sa kang sadili, “Bantayan gid niku kang ugali, ag amanan niku sumalan sa kang baragawun. Pigilan gid niku kang bibig habang sa kang arani ti daut pag manga tawu.”

² Nakan balaw yi lang aku nangingay, balaw gid aku may binagaw. Dapat balaw inda nakaawat sa kangku, dahil inmamat waya gid ti kabuyatan sa kang naisipan.

³ Nabung-anan gid aku masyadu. Ag sa pakaisip niku lalu ngap aku naarimputu. Nakan pagka udyi niku mapigil magkun yi aku,

⁴ “Panginuun, paalalahani aku kuntay may katugkaan kang buhi ag nabilang yi kang manga sirang. Paalalahani aku kuntay maglawuy lang kang buhi.”

⁵ Hayga kainda lang kadag-ud pag buhi ti ipinakaun nimu sa kangku? Sa kanmu pamantay unman inda may pulus. Sa tutuu, ti buhi tawu ga durus lang maglawuy,

⁶ ngatay parihu lang sa aninu magkalyam. Magkahilig ti tawu sa manga buruwatun unman may pulus. Magtipun siya kasiyunan, dapat balaw niya alam nu si unu ti manginabang inda nu mamatay yi siya.

⁷ Ag kainda, Panginuun, unman yi aku may iba waya pag sarigan. Kang pagsarig asan sa kanmu.

⁸ Ribrihan aku sa tanan niku kasalanan, ag danga pagpahintuluti surugun aku manga kurang kay intindi.

⁹ Manidungan yi lang aku; balaw yi lang aku manriklamu, dahil kawu ti magpakuri sa kangku.

¹⁰ Kainda, danga yi aku pagparusahi. Harus mamatay yi aku sa kanmu manga pagpakuri sa kangku.

¹¹ Pagtamyawun nimu ti tawu sa panab-anan pagbunggud sa kanya, sa kay manga salan. Ag parihu sa manga iyay mag-arit-it, pagtabuhun nimu kay mahalaga pag manga kasiyunan. Tutuu gid waydi ti buhi tawu parihu sa durus maglawuy lang.

¹² Saguta kang darangin, Panginuun; patingihi kang maghagad awat. Danga kawu magpabungul sa kang maglumi. Dahil usa lang aku ka day-uhan pag bisita nimu sitay sa kalibutan, parihu sa tanan niku manga ginurang.

¹³ Danga yi kawu magkagalit sa kangku, hampay makabaya waydi aku habang buhi waya aku.