Kanta 38 - Hanunuu

Kanta 38 Darangin Tawu Magdanas Kakurian

Kanta ni Dabid, pagkantahun sa kada magpakaun manga handug bilang pag-alaala sa Panginuun .

¹ Panginuun, sa kanmu pangagalit, danga aku pagparusahi.

² Dahil ga biniyagan nimu aku pamana ag sinuntuk.

³ Balaw mayad kang mag-asaydan sa kang bilug dahil sa kanmu pangagalit sa kang manga kasalanan.

⁴ Ga malimus yi aku sa kang manga kasalanan, parihu inda sa mabuyat pag paras-anun balaw niku makaya.

⁵ Dahil sa kang unman may namuangan, kang manga biyag nabaga ag nabuyuk.

⁶ Magpabarikutut aku sa subra pag sakit, ag magkaruku aku sa buu sirang.

⁷ Balaw mayad ti mag-asaydan sa kang bilug dahil unman may apas kay sakit kang baliw-ang.

⁸ Masyadu yi gid kang kalumuyan. Mag-arunghung aku sa sakit niku mag-asaydan.

⁹ Panginuun, alam nimu ti tanan niku pagkaibgan, ag mag-asaydan nimu kang mag-arunghung.

¹⁰ Magdagubdub kang dubdub; nadura yi kang kabisugan, ag madlum yi kang pamantay.

¹¹ Kang manga kakilala hanggan manga kaibahan maglaklak sa kangku dahil sa kang karamdaman. Una kang manga katawuhan magpakarayu sa kangku.

¹² Ti manga tawu magkaibug mumatay sa kangku magpauli suduk hampay dakpun aku. Sida ti magkaibug manakit sa kangku magharampangan nu kabitay nida aku ipadamhak. Sa buu sirang maggayak sida mandaya sa kangku.

¹³ Magpabungul-bungul lang aku, ga sa balaw aku nakadnug. Magpabuyunun lang aku, ga sa balaw aku makabagaw.

¹⁴ Pagpabunglan niku kanda daut paggayakun ag balaw aku magsagut,

¹⁵ dahil magsarig aku sa kanmu, Panginuun. Kawu, Panginuun kang Diyus, ti magsagut sa kang darangin.

¹⁶ Nakan magdarangin aku danga nimu pahintulutan kang manga kalaban makabaya ngatay magpadayaw nu magpu aku.

¹⁷ Ga midamhak yi ngani aku, ag unman may apas kang pag-agwanta.

¹⁸ Nakan pag-itultul niku kang manga kasalanan magpaaburidu sa kangku.

¹⁹ Mabisug ag mayamu kang manga kalaban. Pagkagalitan nida aku sa unman may singyanan.

²⁰ Pagbalusan nida aku daut sa mayad pagbinwat niku sa kanda. Ag paglabanan nida aku dahil maghingabut aku bumuwat mayad.

²¹ Panginuun niku Diyus, danga aku pagpabay-ani; danga kawu magpakarayu sa kangku.

²² Awati aku rargu, Panginuun kang manugribri.