Kanta 37 - Hanunuu

Kanta 37 Ti Patabgan Daut ag Mayad pag Tawu

Kanta ni Dabid.

¹ Danga kawu magkasamuk sa daut pag manga tawu, ngatay maghirak sa manga magbuwat daut.

² Dahil balaw dumugay bumaliw sida ga ilamnun magkararubay, ngatay parihu sa malangba pag manga halaman magkaralayung.

³ Pagsarig kawu sa Panginuun ag pagbuwat mayad. Ag mangulian kawu ribri sa kadamhakan sa inda pag daga.

⁴ Sa Panginuun nimu hanapun kanmu kabayaan ag iayaw niya kanmu pagkaibgan.

⁵ Pakan-an sa Panginuun ti buu buhi nimu; pagsarig kawu sa kanya ag awatan niya kawu.

⁶ Itultul niya malinaw kuntay matadlung kawu ag balaw may salan, parihu sa singgit init kay ka rayaw nu karaw-an sirang.

⁷ Pagpakabuut kawu sa atubangan Panginuun ag pag-alagad mainagwantahun sa kay buwatun. Danga kawu magkasamuk sa manga tawu may kaabundahan, marapanalu sa kanda daut pag manga gayak.

⁸ Danga kawu magkagalit ngatay magkadaut sa kanda. Danga kawu magkasamuk, dahil makapadaut lang tunda sa kanmu.

⁹ Dahil ti daut pag manga tawu palayasun sa daga Israil, dapat ti magsarig sa Panginuun parargu mangulian sa inda pag daga.

¹⁰ Balaw dumugay magkaradura ti manga daut. Una hanapun waya sida, udyi niyu sida makitan.

¹¹ Dapat ti manga mapinakumbabaun parargu mangulian sa daga Israil may kahusayan ag may kaabundahan.

¹² Ti manga daut maggayak balaw mayad sa manga matadlung, ag pagkagalitan nida sida.

¹³ Dapat pagkasarin-an lang Panginuun ti manga daut, dahil alam niya arani yi ti kaudasan pagsintinsiya.

¹⁴ Ginabut yi manga daut kanda manga baladaw ag linabtung nida kanda manga pamana hampay matyun ti manga makuri hanggan ti manga pugri magpangabuhi sa hustu.

¹⁵ Dapat sida ngapu ti matuhug nida manga baladaw, ag magkarabari kanda manga pamana.

¹⁶ Ti diit pag magkaapu matadlung mas mayad waya kaysa mayamu pag kayamanan manga daut.

¹⁷ Dahil bul-un Panginuun ti kabisugan manga daut, dapat awatan niya ti manga matadlung.

¹⁸ Pag-alagaan Panginuun ti manga pangailangan manga tawu magkabuhi unman may ikasabi. Ag kanda maranahun kanda yi hanggan aban.

¹⁹ Sa udas kakurian balaw sida maunu, una waya sa udas kalun-usan may mayamu di sida pag karan-unun.

²⁰ Dapat ti manga daut midamhak. Sida pag manga kalaban Panginuun magkaramatay parihu sa busang. Magkaradura sida ga anus.

²¹ Ti manga daut mag-udam ag balaw magbayad. Dapat ti manga matadlung marapakaun.

²² Ti manga pagpapaladan Panginuun parargu mangulian sa daga Israil. Dapat ti manga pagkadat-an niya palayasun sa tunda pag daga.

²³ Paggiyahan Panginuun ti manga tiklang tawu kay magkabuhi makapasulung sa kanya.

²⁴ Una mitakid siya, balaw siya magpu dahil paghiyaptan siya Panginuun.

²⁵ Ginan sa kang pagkaanak tugka kainda gurangun yi aku, udwaya aku may nakitan ti manga matadlung pinabay-anan Panginuun ngatay kanda manga anak magpanhagadhagad karan-unun.

²⁶ Pirmi waya ngani sida tig pakaun ag magpaudam, ag kanda manga anak nagbaliw papalad sa iba.

²⁷ Amani ti daut ag buwata ti mayad hampay makaulian kamu sa daga Israil hanggan aban.

²⁸ Dahil magkaibug ti Panginuun sa katadlungan ag balaw niya pagpabay-anan ti manga matinupadun sa kanya. Pag-alagaan niya sida hanggan aban, dapat ti manga linahi manga daut palayasun sa daga Israil.

²⁹ Ti manga matadlung parargu mangulian sa tunda pag daga hanggan aban.

³⁰ Ti pagbagawun matadlung may kadunungan ag kang-ud.

³¹ Paghamnuun niya ti kasuguan niya Diyus sa kay tagipusuun ag balaw niya inda paglabagun.

³² Ti manga daut mag-alagad sa pagdugma sa manga matadlung, ag paggayakun nida matyun sida.

³³ Dapat balaw pag-ipahintulut Panginuun ti manga matadlung sa kamang manga daut. Balaw niya pag-ipahintulut masintinsiyahan kaparusahan ti manga matadlung nu darahun sida sa husgadu.

³⁴ Pagsarig kawu sa Panginuun ag sunda kay kagustuhan, ag pagdayawun niya kawu dahil parargu niya kawu patahanun sa daga Israil. Makitan nimu nu palayasun yi ti manga daut sa tunda pag daga.

³⁵ May nakitan aku kaybi daut pag tawu magpan-api. Pag-isipun niya kay sadili abwat man kaysa iba; parihu siya sa malawis pag manga kayu sidru sa Libanun.

³⁶ Dapat sa uryan namatay siya; nadura yi siya. Pagligawun niku siya, dapat balaw yi niku siya nakitan.

³⁷ Bantayi kaayad ti tawu matinupadun ag matadlung. May mayad siya pag paratabgan ag may kahusayan.

³⁸ Dapat ti tanan makasalanan rurisun; duraun kay mayad pag paratabgan.

³⁹ Ti karibrihan manga matadlung ginan sa Panginuun. Siya kanda marig-un pag darangpan sa udas kakurian.

⁴⁰ Pag-awatan niya sida ag pag-iribri sa manga daut, dahil maghagad sida awat sa kanya.