Kanta 36 - Hanunuu

Kanta 36 Ti Kadautan Tawu ag ti Kaayadan Panginuun

Kanta ni Dabid, ti manugsirbi Panginuun . Para sa manugpanguna sa magkanta.

¹ Inda pag tultulanun paghamnuun niku sa kang tagipusuun tungkul sa pagkamakasalanan daut pag tawu: Ti daut pag tawu balaw magkadala sa Diyus.

² Dahil abwat kay magbantay sa kay sadili, balaw niya mag-akitan kay kadautan hampay kagalitan niya inda.

³ Daut ag kapudilan kay pagbagawun. Balaw yi niya pagbuwatun nu unu ti kang-ud ag ti ikamayad.

⁴ Una mahuwayan siya maggayak di daut. Paghingabtun niya makabuwat balaw mayad, ag balaw niya pagbugyahan ti daut.

⁵ Kanmu pagmahal ag pagkamatinupadun, Panginuun, balaw matakal; mas abwat waya inda sa kalangitan.

⁶ Kanmu pagkamatadlung marig-un parihu sa abwat pag manga bantud. Kanmu paghusay balaw masalman parihu sa kalalawdan dagat. Pag-alagaan nimu, Panginuun, ti manga tawu ag manga hayup.

⁷ Diyus, masyadu mahalaga kanmu pagmahal. Pag-alagaan nimu ti manga tawu parihu sa pag-alaga manuk sa kay manga butu sa sirung niya pakpak.

⁸ Pagustu sida sa abunda pag karan-unun sa kanmu balay; pagpa-inmun nimu sida sa kanmu mahudmay pag danum.

⁹ Dahil kawu ti gimpuunan buhi. Pagrayawan nimu kami, ag magkarayawan kanmi kaisipan.

¹⁰ Pararguhan kanmu pagmahal sa manga magkilala sa kanmu. Pararguhan kanmu buwat matadlung sa manga magkabuhi matadlung.

¹¹ Danga pagpahintuluti taluhun aku niku daut ag marapadayaw pag manga kalaban.

¹² Midamhak gid inda pag daut manga tawu ag udyi gid makabangun.