Kanta 35 - Hanunuu

Kanta 35 Darangin hampay Awatan

Kanta ni Dabid.

¹ Panginuun, amparaha ti manga mag-ampara sa kangku. Labani ti manga maglaban sa kangku.

² Bul-a kanmu panangga, ag awati aku.

³ Alistuhan kanmu diit ag daka pag bangkaw laban sa manga maglagas sa kangku, ag itaratu nimu sa kangku, “Iribri niku kawu”.

⁴ Mana ti manga maggayak mumatay sa kangku mangay-a. Mana ti manga maggayak sa kang kadamhakan mamalalagiwan mantinalalang.

⁵ Mana bumaliw sida parihu sa upa pag-ipayag durus habang pagtabugun sida nimu anghil.

⁶ Mana bumaliw madlum ag maganuy kanda lakawan habang pagbukadun sida nimu anghil.

⁷ Una balaw may kadahilanan nagpauli sida suduk sa lihim para madakup aku, bag-u nagkali sida ukang para malagpak aku.

⁸ Mana madiklahan sida sa rumas-ug kadamhakan sa kanda. Mana sida ngapu ti makasulun sa suduk ipinauli nida sa lihim. Mana sida ngapu ti malagpak sa ukang kanda kinali.

⁹ Bag-u makabaya aku dahil sa pagribri nimu sa kangku, Panginuun.

¹⁰ Ti buu buhi niku sumabi, “Unman gid may pumarihu sa kanmu, Panginuun. Pag-iribri nimu ti manga makuri hanggan ti manga pugri sa manga mag-api ag mag-away sa kanda.”

¹¹ Ti maisug pag manga tawu magkastigus laban sa kangku. Pagbangdanan nida aku manga kasalanan balaw niku binwat.

¹² Pagbalusan nida aku daut sa mayad niku pag buwat sa kanda, nakan nanruku gid aku.

¹³ Dapat nu magkasakit sida, magpanruku aku sa panab-anan pagsulung saku ag magpauray. Ag nu kang darangin para sa kanda balaw pagsagtun,

¹⁴ maglakaw-lakaw aku maghimanglaw parihu sa maghimanglaw aku para sa kang patar-ari ngatay kakilala. Masunguhan aku magkaruku para sa kanda parihu sa maghimanglaw usa ka tawu sa kay ina.

¹⁵ Dapat katpung aku yi ti magkakurian, nagtipun sida magbarayaan. Ti manga tawu balaw niku kilala, nagtipun hampay aku unu-unuhun. Ag unman may apas kanda magpuya sa kangku.

¹⁶ Parihu sa manga balaw maka-diyus maraibgun magpamuya, pagkadat-an nida aku.

¹⁷ Panginuun, tugka waya lugud kapira pag mamantayan lang kawu? Ribrihan aku sa kanda pagdugma sa kangku ga manga liyun.

¹⁸ Bag-u dayawun niku kawu ag pasalamatan sa pagtiripun nimu mayamu pag nasakupan.

¹⁹ Danga pagpahintuluti makabaya kang manugdaya pag manga kalaban sa kang kadamhakan. Danga pagpahintuluti puyaan aku manga magkagalit sa kangku balaw may singyanan.

²⁰ Balaw sida magbagaw manga baragawun ikaayad sa iba, nu unman magbuwat sida tultulanun unman may katutuuhanan laban sa manga tawu magkabuhi tahimik sa inda pag rugar.

²¹ Magringgit sida sa kangku, magbangdan, “Malu! Nakitan nimi kanmu binwat.”

²² Panginuun, nakitan nimu inda, nakan danga kawu magpabaya. Danga kawu magpakarayu sa kangku.

²³ Panginuun niku Diyus, apinan nimu aku sa manga magbangdan sa kangku.

²⁴ Patutuhani, Panginuun niku Diyus, balaw aku may salan angay sa kanmu katadlungan. Danga pagpahintuluti kasarin-an nida aku.

²⁵ Danga pagpahintuluti sumabi sida sa kanda sadili, “Malu, natupad gid kanmi pagkaibgan. Natalu nimi siya!”

²⁶ Mana ti manga magbaya sa kang manga pag-agwanta mangay-a ag mibuyu. Mana ti tanan mag-api sa kangku mibuyu ag mangay-a.

²⁷ Mana manhuruyawan sa kabayaan ti manga magbaya sa kang paglaya ginan sa manga bangdan. Mana pirmi sida sumabi, “Pagdayawun ti Panginuun, magbaya sa kaayadan niya manugsirbi.”

²⁸ Itultul niku kanmu katadlungan, ag dayawun niku kawu pirmi.