Kanta 33 - Hanunuu

Kanta 33 Manga Kanta sa Pagdayaw

¹ Kamu pag manga matadlung, paghuyaw kamu sa kabayaan dahil sa binwat Panginuun sa kanyu. Kamu pag manga magkabuhi sa hustu, kailangan dayawun niyu siya!

² Dayawa niyu ti Panginuun sa panab-anan alpa. Patunugi niyu ti Panginuun manga pamatunug may bakyang.

³ Kantahi niyu siya manga bag-u pag kanta; patunugi niyu siya mayad, ag paghuyaw kamu sa kabayaan.

⁴ Dahil matadlung ti bagaw Panginuun, masarigan ti tanan niya buwat.

⁵ Pagmayadun Panginuun manbuwat matadlung ag matarung. Kay pagmahal makitan sa buu kalibutan.

⁶ Sa panab-anan bagaw Panginuun, nalalang ti kalangitan; ginan sa kay arup ti init, ti bulan, hanggan ti manga pamgasan.

⁷ Mininsan niya ti danum dagat ga isinukad sa usa ka sukadan.

⁸ Kailangan kadalaan tanan tawu sa kalibutan ti Panginuun.

⁹ Sa kay lang bagaw, nalalang ti kalibutan. Nagsugu siya ag namhan ti tanan.

¹⁰ Pagdautun Panginuun ti manga gayak manga nasyun. Balaw niya pagpasnuan matupad kanda manga gayak.

¹¹ Dapat ti gayak Panginuun pumarargu sa unman may katapusan; kay manga turunu pumirmaminti hanggan aban.

¹² Mapalad ti nasyun kay Diyus imaw ti Panginuun. Mapalad ti pinili Panginuun bumaliw kanya pag nasakupan.

¹³ Pagbantayan Panginuun sa langit ti tanan tawu.

¹⁴ Ginan sa kay ulian, pagbantayan niya ti tanan mag-uli sa kalibutan.

¹⁵ Siya ti nagpakaun kaisipan sa tanan tawu, ag alam niya ti tanan nida pagbuwatun.

¹⁶ Ti usa ka hari balaw manalu sa gira dahil lang sa kay kayamuun manga sundalu. Ag ti usa ka sundalu balaw waydi maribri sa gira dahil lang sa kay masyadu pag kabisugan.

¹⁷ Ti manga kabayu balaw masarigan pumanalu sa gira. Kanda masyadu pag kabisugan balaw rumibri.

¹⁸ Dapat ti Panginuun magbantay sa manga maggalang ag magsarig sa kay pagmahal.

¹⁹ Pag-iribri sida sa kamatayan ag sa udas kalun-usan pag-alagaan niya kanda buhi.

²⁰ Mag-alagad kita may pagsarig sa Panginuun. Siya ti mag-awat ag magbaliwa sa kanta.

²¹ Magbaya kita dahil sa kanya, dahil magsarig kita sa kanya, ti banal pag Diyus.

²² Panginuun, mana kanmu pagmahal pumarargu sa kanmi, dahil magsarig kami sa kanmu.