Kanta 32 - Hanunuu

Kanta 32 Ti Pag-ampu sa Kasalanan ag Paghagad Patawad sa Diyus

Kanta ni Dabid. Ti “maskil”.

¹ Mapalad ti tawu pinatawad kay manga paglabag, kay manga kasalanan balaw yi pag-alalahanun Diyus.

² Mapalad ti tawu kay manga kasalanan balaw yi pag-ibilang Panginuun laban sa kanya ag unman siya may pag-itagu kasalanan sa kay tagipusuun.

³ Katpung udwaya niku pag-itapat kang manga kasalanan, magpanlumuy aku, ga magkarunut kang manga but-ul sa kang magpaka-arunghung sa buu sirang.

⁴ Dahil yabi-sirang magkakurian yi aku sa masyadu pag pariga nimu sa kangku; nadura kang kabisugan, parihu sa danum nak-at sa turungun.

⁵ Bag-u kang itinapat kang manga kasalanan sa kanmu; balaw niku inda ilinihim. Buluntad niku itinapat sa kanmu kang manga kasalanan, ag pinatawad nimu aku.

⁶ Nakan ti tanan tapat kailangan magdarangin sa kanmu sa udas kakurian, hampay nu rumas-ug ti kakurian ga baha, balaw sida maunu.

⁷ Kawu kang palalan-iban; alagaan nimu aku sa udas kakurian, ag sangputun nimu aku manga tawu maghuruyawan sa kabayaan dahil sa kanmu pagribri sa kangku.

⁸ Magkun kawu sa kangku, “Itudlu niku sa kanmu ti kailangan nimu lakawan pag dalan. Patigayunan niku kawu habang magbantay aku sa kanmu.

⁹ Danga kawu maghuwad sa kabayu ngatay sa mula unman may intindi, kailangan waya busalan ag rindahan hampay sumunud.”

¹⁰ Mayamu pag kakurian ti magkalakawan manga daut pag tawu, dapat ti magsarig sa Panginuun pagmahalun gid niya.

¹¹ Kamu pag manga matadlung, pagmasulung ag pagbaya sa Panginuun. Kamu pag manga magkabuhi sa hustu, paghuyaw kamu sa kabayaan!