Kanta 31 - Hanunuu

Kanta 31 Ti Darangin Tawu Magsarig sa Diyus

Kanta ni Dabid para sa manugpanguna sa magkanta.

¹ Panginuun, sa kanmu aku magdangup. Danga pagpahintuluti mangay-a aku. Ribrihan aku dahil matadlung kawu.

² Patingihi aku ag rargu ribrihan. Kawu kang palalan-iban pag batu, hanggan alad batu paratag-an para sa kang karibrihan.

³ Dahil kawu kang palalan-iban pag batu ag matibay pag paratag-an, ibahi ag giyahi aku hampay madayaw niku kawu.

⁴ Pakarayuan aku sa ipinauli suduk niku manga kalaban para sa kangku, dahil kawu kang marig-un pag darangpan.

⁵ Pag-iintirga niku sa kanmu kang buhi. Ribrihan aku, Panginuun, Diyus masarigan.

⁶ Pagkadat-an niku ti manga magsamba sa manga diyus-diyusan unman may kabuluhan, dahil magsarig aku sa kanmu, Panginuun.

⁷ Masulung gid aku dahil sa kanmu pagmahal, dahil nakitan nimu kang manga pag-agwanta, ag alam nimu kang manga kakurian.

⁸ Balaw nimu aku ipinakaun sa kang manga kalaban; irinibri nimu aku sa kadamhakan.

⁹ Panginuun, kaawai aku dahil magkakurian aku. Magkarabaga kang mata sa pakalumi, ag magpanlumuy yi aku.

¹⁰ Punu karukuan kang buhi. Pira yi ka timpu maglumi aku pirmi. Magpanlumuy yi aku dahil sa kang manga pag-agwanta, ag ga magkarunut yi kang manga but-ul.

¹¹ Pagpuyaan aku niku tanan kalaban, lalu yi kang manga kasimanwa. Una kang manga kakilala magkadala yi magpakarani sa kangku. Nu mag-akitan nida aku sa dalan magpalagiw sida.

¹² Kinalimtan yi nida aku, ga namatay yi. Para sa kanda parihu aku sa gipak anglit unman yi may kabuluhan.

¹³ Mag-adnugan niku ti maglilibakan mayamu pag manga kalaban. Una aku naan tabug magkadala aku, dahil maggayak sida matyun aku.

¹⁴ Dapat magsarig aku sa kanmu, Panginuun. Kawu kang Diyus.

¹⁵ Kang kapaladan asan sa kanmu; ribrihan aku sa kang manga kalaban maglagas sa kangku.

¹⁶ Pakakitan kanmu kaayadan sa kangku, sa kanmu manugsirbi. Sa kanmu pagmahal, ribrihan aku.

¹⁷ Danga ipahintulut mangay-a aku, Panginuun, dahil sa kanmu aku pag magtawag. Pakay-aha ti manga daut ag panmatya sida hampay humilway sida sa kalubngan.

¹⁸ Patahimika tunda pag manga pudilun, hanggan tunda pag palabi-labihun ag magpuya sa manga matadlung.

¹⁹ Pagkadaka kanmu iinalistu kaayadan sa manga magsunud sa kanmu. Mintaras mabantayan ti manga tawu, pagpakakitan nimu kaayadan ti manga magdangup sa kanmu.

²⁰ Pag-itagu nimu sida sa rugar nu naan asan kanmu kadayawan, ag ati ribri sida sa maglibak hanggan sa magsurug manga tawu.

²¹ Dayawun kawu, Panginuun! Dahil makadululaw gid kanmu pag-ipakakit pag pagmahal sa kangku katpung napil-it aku sa usa ka banwa paggirahun.

²² Sa kang kadalaan naghantup aku, binugyahan yi nimu aku. Dapat pinatingihan di maaw nimu kang magpaawa-awa maghagad awat sa kanmu.

²³ Mahala niyu ti Panginuun, kamu kay matinupadun pag nasakupan. Pag-alagaan Panginuun ti manga matinupadun sa kanya, dapat pagparusahan gid niya lubus ti manga marapadayaw-dayaw.

²⁴ Pagkarig-un kamu ag pagmatutum, kamu pag manga magsarig sa Panginuun.