Kanta 30 - Hanunuu

Kanta 30 Darangin Pagpasalamat

Kanta ni Dabid. Ti kanta sa pagtalaga sa Balay Diyus.

¹ Pagdayawun niku kawu, Panginuun, dahil irinibri nimu aku sa kadautan. Balaw nimu pinahintulutan alukayuhun aku niku manga kalaban sa kang kahamtangan.

² Panginuun niku Diyus, maghagad aku awat sa kanmu, ag pinaayad nimu aku.

³ Irinibri nimu aku sa kamatayan. Balaw nimu pinahintulutan mamatay aku.

⁴ Pagkanta kamu manga pagdayaw sa Panginuun, kamu pag manga matinupadun pag nasakupan. Dayawa niyu siya bilang pag-alaala sa kay kabanalan.

⁵ Dahil kay pangagalit balaw magdugay, dapat kay kaayadan pumarargu hanggan aban. Mahimu sa yabi maglumi kita, dapat rumas-ug ti surip may kabayaan kita.

^6-7 Panginuun, sa kanmu pangaawa pagparig-unun nimu aku parihu sa usa ka bantud. Ag dahil marig-un kang kahamtangan, magkun aku sa kang sadili balaw gid aku maunu. Dapat katpung magpatagu kawu sa kangku, nadala aku.

⁸ Panginuun, nagtawag aku sa kanmu magpaawa-awa. Magkun aku,

⁹ “Unu lugud ti mab-ul nimu nu mamatay aku? Makadayaw aw waya lugud sa kanmu ti namatay pag tawu? Maitultul aw waya lugud niya kanmu katapatan?

¹⁰ Panginuun, patingihi aku ag kaawai. Awati aku!”

¹¹ Kang karukuan inilisan nimu kabayaan may tapil sayaw. Ipinauba nimu sa kangku ti isinulung niku pag saku katpung nanruku aku, bag-u pinakan-an nimu aku kabayaan,

¹² hampay balaw lang aku manidungan, bagkus ngap manganta aku manga pagdayaw sa kanmu. Panginuun niku Diyus, pasalamatan niku kawu sa unman may katapusan.