Kanta 28 - Hanunuu

Kanta 28 Darangin sa Maghagad Awat sa Diyus

Kanta ni Dabid.

¹ Panginuun, kang palalan-iban pag batu, magtawag aku sa kanmu. Patingihi kang darangin! Dahil nu unman kawu mamatingi bumaliw parihu aku sa manga nagkaramatay yi.

² Patingihi kang magpaawa-awa maghagad awat sa kanmu, habang maabwatan kang manga kamang atag sa kanmu banal pag Balay.

³ Danga aku pagsintinsiyahi kaibahan manga daut tawu. Magpanaguabi sida manga kakilala, dapat maaw maggayak sida daut.

⁴ Balusi sida angay sa kanda manga binwat. Parusahi sida sa kanda daut manga pagbuwatun.

⁵ Dahil pag-ipasipala nida kanmu manga pagbuwatun. Nakan padamhakan nimu sida ag pabay-ani sa inda pag kahamtangan.

⁶ Pagdayawun kawu, Panginuun, dahil pinatingihan nimu kang magpaawa-awa sa kanmu.

⁷ Kawu ti magpakaun sa kangku kabisugan ag mag-alaga sa kangku ga panangga. Magsarig aku sa kanmu ag pag-awatan nimu aku. Nakan makabaya gid aku ag manganta pasalamat sa kanmu.

⁸ Kawu, Panginuun, ti magpakaun kabisugan sa kanmu nasakupan. Kawu ti marig-un pag darangpan ag manugribri nimu pinili pag hari ngatay nasakupan.

⁹ Ribrihan ag papaladi kanmu magkaapu pag nasakupan. Alagai sida parihu sa manug-alaga karanidu; alagai sida sa unman may katapusan.