Kanta 27 - Hanunuu

Kanta 27 Darangin may Pagdayaw

Kanta ni Dabid.

¹ Ti Panginuun kang sulu ag manugribri, nakan unman aku magkadala! Ti Panginuun kang darangpan. Balaw aku may pagkadalaan!

² Nu girahun aku niku daut pag manga kalaban agud matyun, sida ngap ti matalu ag balaw aku.

³ Una waya sangputan aku mayamu pag manga sundalu, balaw aku magkadala. Una waya girahun nida aku, magsarig di gid aku sa Diyus.

⁴ Usa ka bagay kang paghagadun sa Panginuun, inda kang gid pagkaibgan: ti makaulian aku sa kay Balay habang buhi aku, agud makitan niku kay kadayawan, ag hilingun sa kanya giyahan niya aku.

⁵ Dahil sa udas kaguluhan itagu niya aku ag alagaan sa kay Balay. Ipauli niya aku sa abwat pag batu, sa rugar nu naan ribri aku sa kaguluhan.

⁶ Nakan magpanalu aku laban sa manga kalaban niku masangputan sa kangku, ag manhandug aku sa Balay Diyus may huyaw sa kabayaan. Manganta aku sa Panginuun!

⁷ Panginuun, patingihi aku nu magdangup sa kanmu; kaawai aku ag saguta kang darangin.

⁸ Tinandug nimu kang tagipusuun kuntay pagdangup aku sa kanmu, nakan nagdangup aku sa kanmu, Panginuun.

⁹ Danga kawu magpatagu sa kangku! Danga aku pagbugyahi dahil sa kanmu pangagalit sa kangku, sa kanmu manugsirbi. Kawu ti mag-awat sa kangku, nakan danga aku pagpabay-ani ngatay pagbugyahi, Diyus kang manugribri.

¹⁰ Una waya dayuun aku niku ama ag ina, alagaan nimu aku, Panginuun.

¹¹ Tudluan sa kangku kanmu kagustuhan. Giyahi aku sa hustu pag dalan, dahil pagbantayan aku niku manga kalaban magkaibug bumwat daut sa kangku.

¹² Danga aku pagpakan-an sa kanda, dahil pagbangdanan nida aku kapudilan bag-u pagkaibgan nida aku pahamakan.

¹³ Dapat magpaniwala gid malakawan niku kanmu kaayadan habang magkabuhi aku sitay sa babaw daga.

¹⁴ Pagsarig kamu sa Panginuun! Pagpakarig-un kamu, danga magkabul-an pag-asa. Pagsarig lang kamu sa Panginuun!