Kanta 26 - Hanunuu

Kanta 26 Ti Darangin Tawu Matadlung

Kanta ni Dabid.

¹ Patutuuhani, Panginuun, kuntay unman aku may kasalanan, dahil magkabuhi aku matadlung ag magsarig sa kanmu unman gid may talinduwa.

² Usisaa aku, Panginuun; usisaa kang kaisipan hanggan tagipusuun.

³ Dahil pirmi niku magkaala-ala kanmu pagmahal, ag pirmi aku magpangabuhi tapat sa kanmu.

⁴ Unman aku magpaamut sa manga tawu pudilun hanggan magpabalhinguun.

⁵ Pagkadat-an niku ti pagtiripun daut pag manga tawu. Balaw gid aku magpaamut sa kanda.

⁶ Pag-ugasan niku kang kamang hampay ipakakit kuntay unman aku may kasalanan. Ag mag-atag aku sa kanmu harandugan hampay mansamba sa kanmu, Panginuun,

⁷ habang magkanta aku manga pasalamat pag kanta ag magtultul tanan nimu makadululaw pag manga binwat.

⁸ Pagmahalun niku ti Balay Diyus kanmu pag-ulian, Panginuun, ti rugar nu naan asan makitan kanmu kadayawan.

⁹ Danga aku rurisa kaibahan manga makasalanan, parihu sa manga manugmatay tawu.

¹⁰ Inda sida magbuwat pirmi kadautan ag pagkuwartahan nida ti iba.

¹¹ Dapat aku magkabuhi unman may ikasabi, nakan ribrihan aku ag kaawai.

¹² Kainda, ribri yi aku, matindugan aku sa maratag pag rugar, nakan dayawun niku kawu, Panginuun, sa pagtiripun nimu nasakupan.