Kanta 25 - Hanunuu

Kanta 25 Darangin hampay Alagaan ag Giyahan Diyus

Kanta ni Dabid.

^1-2 Panginuun niku Diyus, magdarangin aku ag magsarig sa kanmu. Danga pahintulutan nimu mangay-a aku ag kasarin-an niku manga kalaban dahil natalu aku.

³ Ti magsarig sa kanmu balaw mangay-a, dapat ti maradaya mangay-a ngap.

⁴ Panginuun, tudluan sa kangku kanmu manga kagustuhan.

⁵ Tudlui aku magkabuhi angay sa katutuuhanan, dahil kawu ti Diyus kang manugribri. Kawu kang pagsarigan pirmi.

⁶ Panginuun, alalahana kanmu pangaawa hanggan pagmahal, kanmu ipinakakit ginan di waya sa kabag-u.

⁷ Danga yi pag-alalahana ti manga nabwat niku kasalanan katpung anak waya aku. Panginuun, angay sa kanmu pagmahal alalahana aku, hampay maipakakit nimu kanmu kaayadan.

⁸ Mayad ag matadlung kawu, Panginuun, nakan pagtudluan nimu ti manga magsalan sa kanmu kagustuhan.

⁹ Paggiyahan nimu ti manga mapinakumbabaun hampay bumuwat mayad. Pagtudluan nimu sida sa kanmu kagustuhan.

¹⁰ Sa tanan nimu pagbuwatun, pag-ipakakit nimu kanmu pagmahal hanggan katapatan sa manga magsunud sa pag-isugu nimu kasuguan.

¹¹ Panginuun, una mayamu kang manga kasalanan, patawada aku, hampay madayaw kawu.

¹² Panginuun, ti manga maggalang sa kanmu, tudluan nimu dalan dapat nida lakawan.

¹³ Mangabuhi sida abunda ag kanda manga linahi parargu mangulianan sa daga Israil.

¹⁴ Panginuun, arani kawu sa manga tawu maggalang sa kanmu ag pag-ipaalaala nimu sa kanda kanmu kasunduan.

¹⁵ Sa kanmu aku pirmi magdangup, dahil kawu ti magribri sa kangku sa kadamhakan.

¹⁶ Patingihi aku ag kaawai, dahil usa-usa aku ag magkakurian.

¹⁷ Nagyamu yi gid kang manga kakurian; ribrihan aku sa kang manga kaaburiduhan.

¹⁸ Bantayi nimu kang magkalakawan manga kakurian, ag patawada ti tanan niku kasalanan.

¹⁹ Bantayi nu kabitay kayamu kang manga kalaban magkagalit gid sa kangku.

²⁰ Alagai kang buhi ag ribrihan aku! Danga aku pagpakay-aha, dahil sa kanmu aku pag magpalan-ib.

²¹ Matadlung kang buhi ag unman may ikasabi, nakan alagai aku dahil magsarig aku sa kanmu.

²² Diyus, ribrihan ti manga Israilita sa tanan nida kakurian.