Kanta 24 - Hanunuu

Kanta 24 Ti Diyus Makamaskihan pag Hari

Kanta ni Dabid.

¹ Ti buu kalibutan hanggan ti tanan atay Panginuun ti may apu.

² Dahil siya ti nagpauli pundasyun kalibutan sa kaabasad-basadan danum.

³ Si unu lugud ti mahimu makadayik sa bantud Panginuun? Si unu lugud ti mahimu makasaka sa kay banal pag Balay?

⁴ Ti tawu may malumpiyu manga buwat ag kaisipan, balaw magsamba sa manga diyus-diyusan, ag balaw magsumpa sa kapudilan.

⁵ Papaladan sida ag sabihun Panginuun, ti Diyus niya manugribri, kuntay unman sida may kasalanan.

⁶ Tunda pag kalasi tawu ti makapakarani ag magsamba sa Diyus ni Hakub.

⁷ Bukasi ti manga sabian Balay Diyus, ti unman may katapusan pag manga sabian, hampay makasaka ti may kadayawan pag Hari!

⁸ Si unu lugud ti may kadayawan pag Hari? Siya ti Panginuun Makamaskihan ag mabisug sa labanan.

⁹ Bukasi ti daan pag manga sabian Balay Diyus hampay makasaka ti makamaskihan pag Hari!

¹⁰ Si unu lugud ti may kadayawan pag Hari? Siya ti Panginuun Makamaskihan. Hu, siya ti may kadayawan pag Hari.