Kanta 22 - Hanunuu

Kanta 22 Awatan Diyus ti manga Mag-agwanta

Kanta ni Dabid para sa manugpanguna sa magkanta. Kantaha inda sa tunu kanta “Ti usa ka Karasyaw sa Magkasurip”.

¹ Diyus niku, Diyus niku, hayga pinabay-an nimu aku? Hayga arayu kawu sa kangku? Mag-arunghung yi aku sa pakaagwanta, dapat unman diman waydi nimu aku pag-awatan.

² Diyus niku, yabi-sirang magtawag aku sa kanmu, dapat unman nimu aku pagsagtun, nakan unman aku may pahari.

³ Dapat banal kawu, matukawan sa kanmu turukawan, ag pagdayawun manga Israilita.

⁴ Sinmarig sa kanmu kanmi manga ginurang ag irinibri nimu sida.

⁵ Nagtawag sida sa kanmu ag inawatan nimu sida. Nagsarig sida sa kanmu ag balaw sida nibuyu.

⁶ Pagpakay-ahun aku ag pagpuyaan manga tawu. Magkun sida ga iyay aku ag balaw tawu.

⁷ Ti maghiling sa kangku magpuya ag magsurug sa kangku, bag-u mag-il-ilung sida magkun,

⁸ “Magsarig aw waydi kawu sa Panginuun, bati hayga unman niya kawu pag-iribri? Nu tutuu magbaya siya sa kanmu, hayga unman kawu niya pag-awatan?”

⁹ Dapat kawu ti nagpaluwang sa kangku sa tiyan niku ina, ag ginan sa lapsag di waya aku pag-alagaan yi nimu.

¹⁰ Ginan sa kang pagkalusad, sa kanmu aku pag ipinakaun ag kawu lang kang Diyus.

¹¹ Nakan danga aku pagpabay-ani, dahil arani yi rumas-ug ti kakurian ag unman may mangawat sa kangku.

¹² Pagsangputun aku mayamu pag manga kalaban; parihu sida sa maraisug pag manga tudu baka sa Basan.

¹³ Parihu diman sida sa liyun mag-angir, mangangahan, alistu yi sumang-ab sa kangku.

¹⁴ Nabul-an yi aku kabisugan; ga danum nauyang. Ti tanan niku but-ul ga naliw-as. Naduraan aku kabisugan, ga kandila magkaupud.

¹⁵ Naduraan aku kabisugan, parihu sa tigangan daga; bag-u kang dila maghuput sa kang ngarus. Panginuun, pagpabay-anan nimu aku sa daga ga usa ka namatay.

¹⁶ Pinalibutan aku kaban daut pag manga tawu parihu sa manga idu. Binuslutan nida kang manga kamang hanggan manga lulud.

¹⁷ Naglinuwang yi kang manga but-ul, bag-u pagbantayan lang nida aku.

¹⁸ Pinanhuray lang nida kang manga rutay sa panab-anan lunggungan.

¹⁹ Dapat kawu, Panginuun, danga magpakarayu sa kangku. Kawu kang kabisugan, rargu aku awati.

²⁰ Ribrihan aku sa baladaw niku manga kalaban; ribrihan kang buhi sa tunda pag manga idu.

²¹ Ribrihan aku sa tunda pag bibig liyun. Saguta kang darangin ribrihan nimu aku sa manga sungay nida tudu manga baka.

²² Itultul niku sa kang manga kasimanwa kanmu manga binwat. Dayawun niku kawu sa kanda manga pagtiripun.

²³ Kamu pag maggalang sa Panginuun, dayawa niyu siya! Kamu pag manga linahi ni Israil, imaw si Hakub, dayawa ag kadalai niyu ti Panginuun!

²⁴ Dahil balaw niya pagbaliwalaun ngatay pagsaadan ti pag-agwanta manga pugri. Balaw niya sida pagpatlikudan, bagkus ngap pagpatingihan niya kanda maghagad awat.

²⁵ Panginuun pakan-an nimu aku kasulungan magdayaw sa kanmu sa manga pagtiripun nimu nasakupan. Sa atubangan manga magsunud sa kanmu tupadun niku kang taratu manhandug sa kanmu.

²⁶ Mangaun ti manga pugri ag mabsug sida. Dayawun kawu manga magdangup sa kanmu. Pagsa kanda ti kaayadan hanggan ti malawig pag buhi.

²⁷ Ti buu kalibutan makaalala ag bumalik sa kanmu, Panginuun. Sambahun kawu tanan nasakupan tawu sa manga nasyun.

²⁸ Dahil kawu ti maghari; ag kawu ti magdumara sa manga nasyun.

²⁹ Pihu sumamba sa kanmu ti tanan mayaman sa kalibutan. Una ti tanan tawu hirimugtasun manluhud sa kanmu. Hanggan tunda pag manga namatay yi,

³⁰ kanda manga linahi manirbi sa kanmu. Panginuun, itudlu nida sa sunud pag manga sinulput tawu ti tungkul sa kanmu.

³¹ Sida ti udwaya manga iinanak tultuli kuntay irinibri nimu kanmu nasakupan, ag kawu gid ti nagbuwat inda.