Kanta 21 - Hanunuu

Kanta 21 Pagdayaw dahil sa Pagpanalu

Kanta ni Dabid para sa manugpanguna sa magkanta.

¹ Panginuun, magbaya kanmu pinili pag hari, dahil pinakan-an nimu siya kabisugan. Masyadu kay kabayaan dahil pinapanalu nimu siya.

² Ipinakaun nimu sa kanya kay pagkaibgan; balaw nimu inirangan kay paghagadun.

³ Tinanggap nimu siya ag pinakan-an mayad pag manga bagay. Pinasulungan nimu siya kuruna lunsay gid gintu.

⁴ Nanhagad siya dugang pag buhi sa kanmu, ag pinakan-an nimu siya aba gid pag buhi.

⁵ Dahil sa kanmu pagpapanalu sa kanya nagbaliw bantug ag paggalangun gid siya.

⁶ Pinakan-an nimu siya manga papalad pumarargu hanggan aban. Pinasulung gid nimu siya sa kanmu atubangan,

⁷ dahil magsarig siya sa kanmu, Panginuun, ti Kaabwat-abwatan pag Diyus. Ag dahil sa kanmu pagmahal sa kanya balaw siya mapuil.

⁸ Kanmu kapangyarihan imaw ti tumalu sa tanan nimu manga kalaban.

⁹ Nu pumakakit yi kawu, rurisun nimu sida ag bumaliw sida parihu sa maglabdab pag pugun. Sa kanmu pangagalit ipairub nimu sida sa apuy.

¹⁰ Panmatyun nimu ti tanan nida linahi, ag unman gid may masawad sa kanda.

¹¹ Maggayak sida daut laban sa kanmu, dapat balaw gid sida manalu.

¹² Dahil mamalalagiwan sida nu makitan nida alistu yi kawu pumarusa sa kanda, ga paglangiun nimu ag pag-ipatuyang sa kanda kanmu pamana.

¹³ Pagdayawun kawu, Panginuun, dahil sa kanmu kabisugan. Manganta kami manga pagdayaw dahil sa kanmu kapangyarihan.