Kanta 20 - Hanunuu

Kanta 20 Darangin hampay Manalu

Kanta ni Dabid para sa manugpanguna sa magkanta.

¹ Mana dungugun kawu Panginuun nu sa udas kakurian. Mana alagaan kawu Diyus ni Hakub.

² Mana awatan niya kawu ginan sa kay Balay ati sa Siun.

³ Mana tanggapun niya kanmu manga handug, hanggan yi kanmu handug surunugun.

⁴ Mana ipakaun niya kanmu pagkaibgan, ag matupad kanmu manga gayak.

⁵ Manhuruyawan kami sa kanmu pagpanalu; may kabayaan gid kami sa pagdayaw sa kanta Diyus. Mana ngani iayaw Panginuun ti tanan nimu paghagadun.

⁶ Taynguna alam niku pagpanaluhun Panginuun kay pinili pag hari. Pagsagtun niya kay darangin ginan sa banal pag langit, pirmi niya siya pagpanaluhun sa panab-anan niya kamaskihan.

⁷ Ti iba magsarig sa kanda manga kalisa, ti iba sa kanda manga kabayu, dapat kami magsarig sa Panginuun nimi Diyus.

⁸ Tunda pag manga tawu midamhak, dapat kami ngap manalu ag pumarargu marig-un.

⁹ Papanaluha kanmu pinili pag hari, Panginuun; saguta kami nu magtawag sa kanmu.