Kanta 2 - Hanunuu

Kanta 2 Ti Pinili Diyus pag Hari

¹ Hayga nguna maggayak daut ti manga nasyun? Hayga nguna maggayak sida unman waydi may pulus?

² Ti manga hari hanggan ti manga takinan sa kalibutan nagmirinsanan, nag-alistu hampay lumaban sa Panginuun hanggan sa kay pinili pag hari.

³ Magkumun sida, “Danga kita magpasakup ngatay magpasirung sa kanda.”

⁴ Dapat pagkasarin-an lang sida Panginuun matukawan sa kay turukawan ati sa langit.

⁵ Sa kay pangagalit, pinaandaman niya sida ag nadala gid sida.

⁶ Magkun siya, “Ipinatukaw yi niku sa Siun, sa kang banal pag bantud, ti pinili niku pag hari.”

⁷ Magkun ti pinili Diyus pag hari, “Itultul niku ti sinabi sa kangku Panginuun magkumun, ‘Kawu kang anak. Taynguna pag sirang pag ipakilala niku aku kanmu ama.

⁸ Hagada nimu sa kangku ti manga nasyun tugka sa pinakaarayu pag bahagi kalibutan, ag tupadun niku inda ipakaun sa kanmu.

⁹ Panguluhan nimu sida, ag balaw gid may makaampara sa kanmu magpangulu. Bumaliw lang sida ga anglit kanmu runutun.’ ”

¹⁰ Nakan kamu pag manga hari hanggan manga manugpangulu sa kalibutan, intindiha niyu inda pag manga bagaw; patingihi niyu ti manga paandam laban sa kanyu.

¹¹ Sirbihi niyu may paggalang ti Panginuun, pagmasulung kamu sa kanya.

¹² Sunda niyu kay pinili pag hari, dahil nu unman, barang kadaka mangisug siya ag rargu ipadamhak niya kamu. Mapalad ti kada tawu maghagad awat sa Panginuun.