Kanta 19 - Hanunuu

Kanta 19 Ti Kamaskihan Diyus Makitan sa Kay manga Linalang

Kanta ni Dabid para sa manugpanguna sa magkanta.

¹ Ti kalangitan magpatutuu sa kadayawan Diyus ag pag-ipaburayhaw kay binwat.

² Yabi sirang ga magtultul ti kalangitan tungkul sa kay kadayawan.

³ Unman may masaydan bagaw ngatay busis ginan sa kanda,

⁴ dapat kanda tultulanun mag-adnugan di sa buu kalibutan; nibantug inda una naan pag rugar. Nagbuwat ti Diyus ulian init ati sa kalangitan.

⁵ Ati ginan magbutlak ti init nu surip parihu sa lalaki magbaya magluwas sa rugar nu naan siya pag-ikinasal, ngatay parihu sa mag-urunahan sa palalagiwan, alistu pumalagiw.

⁶ Magbutlak inda sa butlakan ag mag-isalup sa isalpan. Ag unman may makapatagu sa kay init.

Ti Kasuguan Panginuun

⁷ Ti kasuguan Panginuun balaw may salan. Magpakaun inda kabisugan nita buhi. Ti manga pag-itudlu Panginuun masarigan, magpakaun kadunungan sa manga balaw may alam.

⁸ Ti manga surundanun Panginuun kang-ud ag magpakaun kabayaan. Ti manga sugu Panginuun balaw may salan ag magrayaw sa naisipan tawu.

⁹ Mayad ti maggalang sa Panginuun, pumirmaminti inda hanggan aban. Ti sintinsiya Panginuun tutuu ag matadlung.

¹⁰ Inda pag manga bagay mahalaga man kaysa lunsay gid pag gintu. Mas matagsing waya kaysa lunsay pag daykut putyukan.

¹¹ Magpakaun diman inda paandam sa kangku, sa kanmu manugsirbi, Panginuun. Nu pagtupadun niku inda makatanggap aku abunda pag pirimyu.

¹² Nu kas-a unman magkaalaman tawu kuntay nagsalan siya. Nakan Panginuun, lumpiyuha aku sa manga kasalanan balaw niku magkaalaman!

¹³ Awati diman aku balaw makatikis makabwat salan. Danga nimu ipahintulut aku panawuhun kadautan, agud unman may ikasabi sa kang buhi ag makalpas aku sa mayamu pag kalasi kasalanan.

¹⁴ Mana kang manga pagbagawun hanggan manga pag-isip-isipun makapasulung sa kanmu, Panginuun, kang palalan-iban pag batu ag manugribri.