Kanta 18 - Hanunuu

Kanta 18 Ti Kanta sa Pagpanalu ni Dabid

Kanta ni Dabid, ti manugsirbi Panginuun . Para sa manugpanguna sa magkanta. Kinanta niya inda katpung irinibri siya Panginuun ginan sa kan Saul ag sa iba waya niya kalaban.

¹ Pagmahalun niku kawu, Panginuun. Kawu kang kabisugan.

² Panginuun, kawu kang palalan-iban pag batu, kang matibay pag paratag-an ag manugribri. Bilang palalan-iban pag batu, makapatagu aku sa kanmu. Kawu kang panangga, makamaskihan pag manugribri, ag darangpan.

³ Dayawun kawu, Panginuun, dahil nu maghagad awat aku sa kanmu pag-iribri nimu aku sa kang manga kalaban.

^4-5 Ti kamatayan parihu sa lubid masabudan sa kangku ag ga suduk sa kang lakawan. Ti kadamhakan parihu sa mabaskug pag baha maglapaw sa kangku.

⁶ Nakan sa kang kakurian magtawag aku sa kanmu, Panginuun. Maghagad aku awat sa kanmu, Diyus niku, pinatingihan nimu kang darangin sa kanmu Balay.

⁷ Bag-u naglinug, hanggan ti manga patakinan manga bantud nahalu, dahil nagalit kawu, Panginuun.

⁸ Linmuwang ti anus sa kanmu irung, sa kanmu bibig linmuwang ti madala pag apuy ag maglabdaban pag manga baga.

⁹ Binukasan nimu ti langit, dinmugsun kawu masakyan sa magal-um pag rurum.

¹⁰ Sinmakay kawu sa kirubin, mabisug linmayang napadara sa durus.

¹¹ Binwat nimu ti kadudulman tabun sa kanmu sangput. Napatagu kawu sa madamul pag rurum.

¹² Kinmilat sa kanmu atubangan, ag ginan sa rurum linmuwang ti manga yilu hanggan ti maglabdaban pag manga baga.

¹³ Kanmu busis Panginuun, Kaabwat-abwatan pag Diyus, magkurarug ginan sa langit.

¹⁴ Pinana nimu kilat kanmu manga kalaban, ag namalalagiwan sida namululagan.

¹⁵ Sa kanmu pagtamyaw ag masyadu pag pangagalit, namara ti dagat, ag linmutaw ti daga, ag niburayhaw diman ti patakinan kalibutan.

¹⁶ Ginan sa langit ginamit nimu aku ag bin-ul ginan sa abasad pag danum.

¹⁷ Irinibri nimu aku ginan sa makapangyarihan niku pag manga kalaban balaw niku kaya labanan.

¹⁸ Sinalakay nida aku sa udas niku kakurian, dapat inawatan nimu aku, Panginuun.

¹⁹ Irinibri nimu aku sa kadamhakan, dahil aku kanmu pagbayaun.

²⁰ Pagpapaladan nimu aku dahil matadlung kang buhi ag unman aku may nabwat kasalanan.

²¹ Dahil pagsundun niku kanmu manga kagustuhan ag unman aku napablag sa kanmu, Panginuun niku Diyus.

²² Pagtupadun niku ti tanan nimu sugu ag balaw niku paglabagun kanmu manga surundanun.

²³ Alam nimu unman may ikasabi kang buhi, pag-amanan niku ti kadautan.

²⁴ Nakan ngani pagpirimyuhan nimu aku, dahil nakitan nimu magkabuhi aku matadlung ag unman aku may pagbuwatun kasalanan.

²⁵ Matinupadun kawu sa manga matinupadun sa kanmu, ag mayad kawu sa mayad pag manga tawu.

²⁶ Mayad kawu sa manga mayad sa kanmu, ag matinudukun kawu sa manga daut.

²⁷ Hu, pag-iribri nimu ti manga mapinakumbabaun, dapat pag-ipaababa nimu ti manga marapadayaw-dayaw.

²⁸ Panginuun, kawu kang rayaw. Sa kadudulman, kawu kang sulu.

²⁹ Sa kanmu awat, kaya niku girahun ti gurupu manga sundalu, ag kaya niku daykun kanda palalan-iban pag alad batu.

³⁰ Diyus, kanmu palakaw unman may ikasabi. Kanmu bagaw masarigan gid. Parihu kawu sa panangga sa tanan magdangup sa kanmu.

³¹ Kawu lang, Panginuun, ti Diyus; kawu lang kanmi palalan-iban pag batu.

³² Kawu ti magpakaun kabisugan sa kangku, hanggan ti magbantay sa kang lakawan.

³³ Pagpabisugun nimu kang manga lulud parihu sa manga lulud karasyaw, agud makaagwanta aku magtukad sa arabwat pag manga rugar.

³⁴ Pagpaantiguhun nimu aku sa maggira, parihu sa paglabtung sa maganit pag bayi.

³⁵ Kawu parihu sa panangga mag-alaga sa kangku, nakan ribri kang buhi. Pagpatakipan nimu aku sa panab-anan nimu kamaskihan, ag sa panab-anan nimu awat nibantug aku.

³⁶ Pagpakan-an nimu aku marayaw pag lakawan, nakan balaw mag-iligsay kang lulud.

³⁷ Linagas niku kang manga kalaban ag natalu niku sida. Balaw gid aku inmapas tugka sa naruris niku sida.

³⁸ Binakul niku sida ag nagkaraplid sa kang may malulud; udyi sida nakabangun waya.

³⁹ Pinakan-an nimu aku kabisugan sa paggira, nakan natalu niku kang manga kalaban.

⁴⁰ Pinapalagiw nimu kang manga kalaban ag rinuris niku ti magkagalit sa kangku.

⁴¹ Maghagad sida awat, dapat unman may nangawat sa kanda. Nagtawag sida sa kanmu, Panginuun, dapat balaw nimu sida sinagut.

⁴² Rinunut niku sida tugka sa nagbaliw wadi galbuk pagpalidun durus, bag-u tinatatataan niku sida ga lutuk sa dalan.

⁴³ Irinibri nimu aku sa manga maglaban niku pag nasakupan. Binwat nimu aku takinan manga nasyun. Ti manga taga iba rugar magsirbi sa kangku.

⁴⁴ Mag-asaydan di waya nida aku, magluhud sida sa kadalaan, ag rargu magsunud sa kang sugu.

⁴⁵ Nadala sida, nakan magluwas sida sa kanda manga paratag-an pagtakigan sa dala.

⁴⁶ Buhi kawu, Panginuun! Dayawun kawu kang palalan-iban pag batu! Pag-ipaabwat niku kawu dahil kawu ti Diyus kang Manugribri.

⁴⁷ Pagbalusan nimu kang manga kalaban, ag pag-ipasirung nimu ti manga nasyun sa kangku.

⁴⁸ Pag-iribri nimu aku sa kang maraisug pag manga kalaban, ag pag-ipapanalu nimu aku sa kanda.

⁴⁹ Nakan dayawun niku kawu sa tanan nasyun Panginuun. Kantahan niku kawu manga pagdayaw.

⁵⁰ Pagpakan-an nimu mayamu pag panalu kanmu pinili pag hari. Pagmahalun nimu si Dabid hanggan kay manga linahi sa unman may katapusan.