Kanta 17 - Hanunuu

Kanta 17 Ti Darangin Tawu Matadlung

Kay darangin ni Dabid.

¹ Patingihi, Panginuun, kang maghagad katadlungan. Patingihi kang buu tagipusuun darangin.

² Alam nimu nu unu ti kang-ud, nakan kawu ti makasintinsiya kuntay unman aku may kasalanan.

³ Inusisa nimu kang tagipusuun una yabi. Sinubukan nimu aku ag unman kawu may nakitan kasalanan sa kangku. Naggayak aku balaw mamagaw daut

⁴ parihu sa pagbuwatun iba. Sa panab-anan pagsunud niku sa kanmu manga sugu, naamanan niku ti pag-unuunu.

⁵ Pagsundun niku pirmi kanmu kagustuhan ag unman aku magpablag siti.

⁶ Diyus, magdarangin aku sa kanmu dahil alam niku pagsagtun nimu aku. Patingihi duy kang darangin.

⁷ Pakakitan kanmu makadululaw pag pagmahal. Sa panab-anan nimu kapangyarihan, pag-iribri nimu ti manga tawu maghagad awat sa kanmu dahil sa kanda manga kalaban.

⁸ Alagai aku parihu sa pag-alaga tawu sa kay mata, ag alagai aku parihu sa pag-alaga manuk sa kay manga butu sa sirung niya manga pakpak.

⁹ Apinan nimu aku sa kang manga kalaban magsalakay sa kang sangput hampay matyun aku.

¹⁰ Unman sida may pangaawa, ag palabi-labihun nu magbagaw.

¹¹ Hinanap nida aku ag taynguna pagpalibutan yi nida aku. Mag-alagad sida pagkakataun pagpuun aku.

¹² Parihu sida sa liyun magpalan-ib, alistu tumkub sa kay turukbun.

¹³ Ta, Panginuun, labani ag taluha kang daut pag manga kalaban. Ribrihan aku sa kanda sa panab-anan nimu kamaskihan.

¹⁴ Ribrihan aku sa inda pag manga tawu magkahilig lang sa manga bagay sitay sa kalibutan. Parusahi sida parusa iinalistu nimu sa kanda, hanggan yi kanda manga kalay-awan. Alistuhi diman parusa kanda manga laki.

¹⁵ Dapat aku inda makakit sa kanmu dahil unman aku may nabwat kasalanan. Sa kang pag-ipulaw makabaya gid aku makakit sa kanmu.