Kanta 16 - Hanunuu

Kanta 16 Darangin may Pagsarig sa Diyus

Ti “miktam” ni Dabid.

¹ Diyus, alagai aku; sa kanmu aku pag maghagad awat.

² Kawu kang Panginuun. Ti tanan niku natanggap pag kaayadan ginan lang gid sa kanmu.

³ Nu tungkul sa kanmu marig-un pag nasakupan sa daga Israil manga kadayaw-dayaw gid sida. Daka gid kang kabayaan sa kanda.

⁴ Dapat ti manga magdangup sa manga diyus-diyusan lalu di madugangan kanda manga kakurian. Balaw aku kumuyug sa kanda maghandug dugu sa manga diyus-diyusan, ag balaw gid niku sambitun tunda pag manga ngaran manga diyus-diyusan.

⁵ Panginuun, kawu ti tanan sa kangku. Pag-ipakaun nimu ti tanan niku pangailangan. Kang buhi asan sa kanmu manga kamang.

⁶ Makadululaw gid kanmu manga papalad sa kangku, ga mayad pag tanman. Ungud, mayad gid kang manga natanggap ginan sa kanmu.

⁷ Pagdayawun niku kawu, Panginuun, dahil pagpaanyuun nimu aku. Una yabi magpaanyu sa kangku kang kaisipan.

⁸ Panginuun, pirmi niku kawu pag-isipun. Ag dahil asan kawu sa kang arani, balaw aku mataranta.

⁹ Nakan ngani magbaya aku; kang buhi lunsay kabayaan. Ag mangabuhi aku ribri sa kadamhakan,

¹⁰ dahil balaw nimu aku pagpabay-anan miatag sa ulian manga namatay. Balaw nimu pahintulutan marunut kanmu marig-un pag manugsirbi.

¹¹ Pagtudluan nimu aku nu kabitay matanggap ti mayad pag buhi, ag sa kanmu lang pag masampakan ti kaariwayahan unman may katapusan.