Kanta 147 - Hanunuu

Kanta 147 Pagdayaw sa Diyus Makamaskihan

¹ Dayawun ti Panginuun! Mayad gid magkanta manga pagdayaw sa Diyus nita. Marinu gid ag dapat lang dayawun siya.

² Pag-ipatindug maan Panginuun ti Hirusalim; ag pagtipunun maan niya ti nabihag pag manga taga Israil.

³ Pagpaayadun niya ti manga tagipusuun nibuyu; pagbulungun niya kanda manga biyag.

⁴ Alam niya nu kabitay kayamu ti pamgasan, ti kada usa sa kanda pinakan-an niya ngaran.

⁵ Makamaskihan gid kanta Panginuun; kay kadunungan unman may katugkaan.

⁶ Pag-awatan Panginuun ti manga pag-apihun, dapat pagrurisun niya ti manga daut pag tawu.

⁷ Pagkanta kamu may pasalamat sa Panginuun. Pagpatunug kamu manga pamatunug may bakyang para sa kanta Diyus.

⁸ Pagpun-un niya manga rurum ti kalayawan, pagpauranan niya ti kalibutan, ag pagpatubuun ti manga ilamnun sa manga kabantudan.

⁹ Pagpakan-an niya karan-unun ti manga hayup ag ti manga pispis uwak nu maghagad sida karan-unun.

¹⁰ Kay kabayaan balaw sa mabisug pag manga kabayu ngatay sa kaisugan manga sundalu;

¹¹ kay kabayaan sa manga maggalang di sa kanya ag magsarig sa kay pagmahal.

¹² Dayawun niyu ti Panginuun niyu Diyus, kamu pag manga mag-uli sa Hirusalim.

¹³ Dahil pagpatibayun niya ti manga sabian niyu banwa, ag pagpapaladan niya kamu.

¹⁴ Pagpakan-an niya kahusayan kanyu rugar, ag pagbusugun niya kamu sa pinakamayad pag tirigu.

¹⁵ Pagsuguun niya ti kalibutan, ag rargu magsunud.

¹⁶ Paglatagan niya snow ti daga ga kumut malagti, ag pagwayakun niya ti pinu pag yilu bilang ga dapug.

¹⁷ Magpadara siya yilu pag uran ga dariit pag manga batu. Unman may makapadugay sa kay ramig.

¹⁸ Sa kay sugu nagtunas ti yilu; pinahuyup niya ti durus ag ti yilu nagbaliw danum magbulus.

¹⁹ Itinultul niya kay manga bagaw, manga surundanun, ag manga sugu sa manga taga Israil kay manga linahi ni Hakub.

²⁰ Unman niya inda binwat sa iba pag manga nasyun; unman nida alam kay manga sugu. Dayawun ti Panginuun!