Kanta 145 - Hanunuu

Kanta 145 Kanta sa Pagdayaw

Ti kanta sa pagdayaw kay isinurat ni Dabid.

¹ Dayawun niku kawu, kang Diyus ag Hari. Dayawun niku kawu hanggan aban

² Sirang-sirang dayawun niku kawu, ag buwatun niku inda hanggan aban.

³ Makamaskihan kawu, Panginuun, ag dapat gid dayawun. Kanmu kamaskihan balaw gid masalman.

⁴ Ti kada sinulput manultul sa dumasun pag sinulput tungkul sa kanmu makamaskihan pag manga binwat.

⁵ Isip-isipun niku kanmu kadayawan ag kamaskihan, hanggan kanmu makadululaw pag manga binwat.

⁶ Itultul manga tawu ti kamaskihan nimu makadululaw pag manga binwat, ag ipamarita diman niku kanmu pagkamaskihan.

⁷ Itultul nida ti kabantugan nimu daka pag kaayadan, ag manganta sida may kabayaan tungkul sa kanmu katadlungan.

⁸ Panginuun, maawaun kawu ag mainawatun; mapagmahal kawu ag balaw madali magalit.

⁹ Panginuun, mayad kawu sa tanan; magpasunaid kawu sa tanan nimu linalang.

¹⁰ Pasalamatan kawu, Panginuun, nimu tanan linalang; dayawun kawu nimu tapat pag nasakupan.

¹¹ Itultul nida kanmu kadayawan ag kamaskihan sa kanmu maghari,

¹² hampay maalaman tanan tawu kanmu bantug pag binwat ag ti kabantugan nimu maghari.

¹³ Kanmu maghari hanggan aban. Panginuun, matinupadun gid kawu sa kanmu manga taratu, ag mapagmahal kawu sa tanan nimu linalang.

¹⁴ Pag-awatan nimu ti tanan maglakaw sa kakurian ag pagpabisugun ti manga magpanlumuy.

¹⁵ Ti tanan may buhi pag linalang magsarig sa kanmu, ag pag-ayawan nimu sida kanda karan-unun sa udas kailangan nida.

¹⁶ Pagpakan-an nimu sida kang-ud ag magkabsug sida.

¹⁷ Panginuun, matadlung kawu sa tanan nimu paraan, ag matinupadun kawu sa tanan nimu pagbuwatun.

¹⁸ Panginuun, arani kawu sa tanan magtawag sa kanmu.

¹⁹ Pag-iayaw nimu ti pagkaibgan manga maggalang sa kanmu; pagpatingihan nimu kanda magdangup, ag pag-iribri nimu sida.

²⁰ Pagbantayan nimu ti tanan magmahal sa kanmu, dapat ti tanan pag daut rurisun nimu.

²¹ Dayawun niku kawu, Panginuun. Ti tanan may buhi dumayaw sa kanmu hanggan aban.