Kanta 144 - Hanunuu

Kanta 144 Pagpasalamat Hari sa Diyus dahil sa Kay Panalu

Ti isinurat ni Dabid pag kanta.

¹ Dayawun ti Panginuun kang palalan-iban pag batu. Pagpaanadun niya aku sa paglaban.

² Siya ti kang mapagmahal pag Diyus ag marig-un pagpalalan-iban. Siya kang palalan-iban ag kang manugribri. Siya ti kang panangga ag sa kanya aku maghagad awat. Pag-ipasakup niya sa kangku ti manga nasyun.

³ Panginuun, unu gid lugud ti tawu pag-alalahanun gid nimu? Tawu lang siya, hayga pag-isip-isipun gid nimu?

⁴ Parihu diman siya sa durus maglawuy ag kay manga sirang ga aninu mabisug lang magkadura.

⁵ Panginuun, bukasi ti langit ag pagdugsun kawu. Ayuhapa ti manga bantud hampay manganus.

⁶ Gamita nimu ga pamana ti kilat hampay magpinalagiw ag mawayak kang manga kalaban.

⁷ Ginan sa langit, gamita aku ag ribrihan sa kapangyarihan manga kalaban taga iba rugar, parihu sa mabaskug pag danum.

⁸ Inda sida balaw magtultul kay tutuu ag magpudil una sa kanda magsumpa.

⁹ Kantahan niku kawu, Diyus, bag-u pag kanta pagkaskasan alpa.

¹⁰ Kawu ti magpakaun panalu sa manga hari ag nagribri kan Dabid sa kanmu manugsirbi ginan sa kamatayan.

¹¹ Ribrihan aku sa kapangyarihan manga day-uhan pagkalaban, unman magsabi kay tutuu ag magpudil una sa kanda magsumpa.

¹² Mana kanmi manga anak lalaki habang anak waya sida, bumaliw parihu sa manga tanum magtubu malangba, ag kanmi manga anak babayi bumaliw parihu sa mararinu pag manga tulduk balay hari.

¹³ Mana mapunu kanmi haramnuan tanan pag kalasi inani. Mana linibu-libu ti kanmi manga karanidu sa pasturan,

¹⁴ ag kanmi manga baka mangarga mayamu pag manga kalakal. Mana unman yi kami salakayun manga kalaban ag unman yi kami pagbihagun. Ag mana balaw yi may lulumian sa kanmi baklayan ag karukuan.

¹⁵ Mapalad ti manga tawu kainda kay kahamtangan. Mapalad ti manga tawu kanda Diyus imaw ti Panginuun.