Kanta 143 - Hanunuu

Kanta 143 Darangin sa Udas Kakurian

Ti isinurat ni Dabid pag kanta.

¹ Panginuun, patingihi kang darangin; patingihi kang magpaawa-awa. Dahil matadlung ag matinupadun kawu, awati aku.

² Danga aku pagsintinsiyahi kanmu manugsirbi, dahil unman may una usa ti matadlung sa kanmu atubangan.

³ Pag-aringun gid aku niku manga kalaban. Pagtaluhun nida aku ag ipinauli sa madlum pag pirisuhan; parihu aku sa usa ka tawu dugay yi namatay.

⁴ Nakan naduraan aku pag-asa ag napnu kadalaan kang tagipusuun.

⁵ Naalaala niku ti manga binwat nimu kaybi; pag-isip-isipun niku ti tanan nimu binwat.

⁶ Ipinaabwat niku kang manga kamang sa kanmu sa kang magdarangin; magkauwaw aku sa kanmu parihu sa mamara pag daga magkauwaw sa danum.

⁷ Saguta aku rargu, Panginuun. Naduraan yi aku pag-asa. Danga kawu magpatagu sa kangku, barang mamatay aku.

⁸ Kada surip, ipaalaala sa kangku kanmu pagmahal, sa kanmu aku magsarig. Pakakitan sa kangku ti tama pag dalan kang lakawan, dahil sa kanmu aku pag magdarangin.

⁹ Ribrihan aku sa kang manga kalaban, Panginuun, dahil sa kanmu aku maghagad awat.

¹⁰ Tudlui aku sa pagsunud sa kanmu kagustuhan, dahil kawu kang Diyus. Mana kanmu mayad pag Ispiritu mag-antabay sa kangku sa kahamtangan balaw may kadamhakan.

¹¹ Ribrihan aku, Panginuun, hampay galangun kawu. Dahil matadlung kawu, ribrihan aku sa kakurian.

¹² Dahil sa kanmu pagmahal sa kangku, rurisa kang manga kalaban, dahil aku kanmu manugsirbi.