Kanta 141 - Hanunuu

Kanta 141 Darangin tungkul sa Pag-alaga Diyus

Ti isinurat ni Dabid pag kanta.

¹ Panginuun, magdangup aku sa kanmu; awati aku kainda. Patingihi kang magpakatawag sa kanmu.

² Tanggapa mana nimu kang darangin ga kamangyan. Tanggapa ti pagpaabwat niku manga kamang sa magdarangin ga handug panyabi.

³ Panginuun, awati nimu aku hampay balaw makabagaw daut.

⁴ Ipakarayu nimu aku sa pagbuwat kadautan hanggan sa manga tawu magbuwat kainda. Ipakarayu diman nimu aku sa kanda manga karan-an hampay balaw mansaru.

⁵ Tanggapun niku ti parusa ag pagsungyaw tawu matadlung, dahil pagbuwatun nida inda may pagmahal ag may pasunaid sa kangku. Inda ga lana ulibu sa kang ulu. Dapat sa daut pag manga tawu pirmi aku magdarangin laban sa kanda daut pag buwatun.

⁶ Nu iyamut yi kanda manga takinan sa mabatu pag yangpas, maniwala sida kuntay tutuu ti manga pagsabihun niku.

⁷ Sumabi sida, “Manwayak sa kalubngan kanta but-ul parihu sa manga batu naglinuwang nu pag-araduhun ti daga.”

⁸ Panginuun Diyus, sa kanmu gid aku magsarig; sa kanmu aku maghagad panangga, nakan danga gid pagpahintuluti mamatay aku.

⁹ Pakarayuan aku ginan sa manga suduk ipinauli manga daut para sa kangku.

¹⁰ Mana ngani sida ngapu ti makasulun sa kanda sadili manga suduk, ag aku makaaman ati.