Kanta 140 - Hanunuu

Kanta 140 Darangin hampay Alagaan Diyus

Ti isinurat ni Dabid pag kanta para sa manugpanguna sa magkanta.

¹ Panginuun, ribrihan aku sa daut ag maisug pag manga tawu.

² Maggayak sida daut pirmi lang nida pagpalabanun ti manga tawu.

³ Kanda dila parihu sa dalit ulay; kanda manga bagaw ga dalit ulay.

⁴ Panginuun, alagai aku sa kamang daut ag maisug pag manga tawu, maggayak pumadamhak sa kangku.

⁵ Namauli suduk ti manga palabi-labihun para sa kangku; namauli sida kanda manga sarap hampay mablay nida aku sa kang lakawan.

⁶ Panginuun, kawu kang Diyus. Panginuun, patingihi kang magpaawa-awa sa kanmu.

⁷ Panginuun Diyus, kawu kang makamaskihan pag manugribri; pag-alagaan nimu aku sa katpung udas girahan.

⁸ Panginuun, danga pag-ayawan sa manga daut kanda manga pag hingbutun. Danga pagpahintuluti pumanalu kanda manga gayak, dahil barang manpadayaw-dayaw sida.

⁹ Mana ti daut pag manga gayak masangputan sa kangku mangyari gid sa kanda.

¹⁰ Mana malagpakan sida maglabdab pag manga baga. Mana ilagpak sida sa manga ukang, sa udyi sida makabangun waya.

¹¹ Mana balaw dumugay sa daga ti manga tawu magbangdan sa iba. Mana rumas-ug ti sarut sa maisug pag manga tawu, imaw ti rumuris sa kanda.

¹² Panginuun, alam niku pag-alagaan nimu ti karampatan manga makuri; pagpakan-an nimu katadlungan ti manga pugri.

¹³ Pihu dayawun gid kawu manga matadlung ag mangabuhi sida kaibahan nimu.