Kanta 139 - Hanunuu

Kanta 139 Ti Kadunungan ag Pag-alaga Diyus

Ti isinurat ni Dabid pag kanta para sa manugpanguna sa magkanta.

¹ Panginuun, pag-usisaun nimu aku nakan kilala nimu aku.

² Alam nimu nu matukawan aku ngatay matindugan. Una asan kawu sa arayu alam nimu ti tanan niku pag-isip-isipun.

³ Pagbantayan nimu aku sa kang magtarabahu ag magpahari. Alam nimu ti tanan niku pagbuwatun.

⁴ Panginuun, una unman waya aku makabagaw, alam yi nimu kang sarabihun.

⁵ Pirmi kawu kang kaibahan, ag pag-alagaan aku nimu kamaskihan.

⁶ Kanmu magkilala tungkul sa kangku tutuu gid makadululaw; unman niku inda magkasalman.

⁷ Kabitay aku makaaman sa kanmu Ispiritu? Naantag waya aku pagmakaatag nu unman kawu?

⁸ Nu atabug waydi aku sa langit, ati kawu; nu atabug waydi aku sa ulian manga namatay, ati diman kawu.

⁹ Nu atabug waydi aku sa butlakan ngatay mangulian sa pinakaarayu pag rugar sa isalpan,

¹⁰ ati diman kawu hampay giyahan ag awatan aku.

¹¹ Mahimu hagadun niku ti dulum hampay pumatakip sa kangku, ngatay ti rayaw sa sangput niku bumaliw yabi.

¹² Dapat una ti madulum balaw madlum para sa kanmu, ag ti yabi parihu lang karayaw sa sirang. Dahil ti madulum ag ti rayaw parihu lang sa kanmu.

¹³ Kilala nimu aku dahil kawu ti naglalang sa kangku. Kawu ti naghistuda sa kangku sa tiyan niku ina.

¹⁴ Pagdayawun niku kawu dahil makadululaw gid kanmu naglalang sa kangku. Makadululaw kanmu manga binwat, ag alam gid niku inda.

¹⁵ Nakitan nimu kang manga but-ul katpung hinistuda aku sa lihim sa sulud tiyan niku ina.

¹⁶ Nakitan yi nimu aku una balaw waya aku nahistuda. Ti itinagka pag manga sirang hampay mangabuhi aku nakasurat yi sa kanmu libru, una unman waya inda mag-umpisa.

¹⁷ Diyus, unman niku masalman kanmu pag-isip-isipun; masyadu inda mayamu.

¹⁸ Nu bilangun niku inda, mayamu waya inda kaysa baras. Nu mag-ipulaw aku kang kaisipan asan diman sa kanmu.

¹⁹ Diyus, mana panmatyun nimu ti manga daut! Mana pumakarayu sa kangku ti manga manugmatay sa tawu.

²⁰ Magbagaw sida daut tungkul sa kanmu. Sida kanmu manga kalaban magbanggit kanmu ngaran sa unman may pulus.

²¹ Panginuun, pagkagalitan niku ti manga magkagalit sa kanmu. Pagkadat-an niku ti manga maglaban sa kanmu.

²² Masyadu gid kang pangagalit sa kanda; pagkilalan-un niku sida kang manga kalaban.

²³ Diyus, usisaa aku hampay maalaman nimu kang tagipusuun. Subuki aku, alama nimu kang pag-isip-isipun.

²⁴ Bantayi nu may daut aku pag-ugali ag giyahi aku sa dalan niku dapat lakawan tugka aban.