Kanta 137 - Hanunuu

Kanta 137 Ti Sarabihun manga Israilita pagka Sida Binihag

¹ Tinmukaw kami sa saruy manga sapa sa Babilunya ag nanlulumian pagka magkaala-ala nimi ti Siun.

² Isinad-ang yi lang nimi kanmi manga alpa sa manga sanga kayu.

³ Pagpakantahun kami manga nagbihag sa kanmi. Pagsuguun nida kami sa pagpasulung sa kanda. Magkun sida, “Kantahi niyu kami kanta tungkul sa Siun!”

⁴ Kabitay kami makakanta manga kanta para sa Panginuun sa daga manga nagbihag sa kanmi?

⁵ Mana balaw yi tumandug kang sikun pag kamang nu kalimtan niku ti Hirusalim!

⁶ Mana bumaliw aku buyun nu unman niku alalahanun ti daka pag kabayaan niku ti Hirusalim.

⁷ Panginuun, alalahana nu hintay ti binwat manga Idumita katpung inagaw Babilunya ti Hirusalim. Magkun sida, “Dauti yi niyu tunda.”

⁸ Kamu pag manga mag-uli sa Babilunya, rurisun kamu! Mapalad ti manga tawu rumuris sa kanyu ga kanyu binwat sa kanmi.

⁹ Mapalad sida ti bumuul sa kanyu dariit pag manga anak bag-u ihampak sa manga batu.