Kanta 135 - Hanunuu

Kanta 135 Kanta sa Pagdayaw

¹ Dayawun ti Panginuun! Dayawun niyu siya, kamu kay manga manugsirbi

² magsirbi sa Balay Diyus Panginuun kanta Diyus.

³ Dayawa ti Panginuun dahil mayad siya. Pagkanta kamu manga pagdayaw sa kanya dahil mayad tunda buwatun.

⁴ Dayawa niyu siya dahil pinili niya ti nasakupan Israil ti manga linahi ni Hakub, ti bumaliw kay bukudtangi pag nasakupan.

⁵ Alam niku ti Panginuun makamaskihan, ag labaw sa tanan pag diyus.

⁶ Pagbuwatun Panginuun ti una unu ti pagkaibgan niya sa langit, sa daga, sa dagat, ag sa kaabasad-basadan inda.

⁷ Pagdaran-un niya patungud ti manga rurum ginan sa pinakaarayu pag bahagi sa kalibutan, ag magpadara siya manga kilat kaibahan sa uran. Pag-ipalwas niya ti bagyu ginan sa kanda taraguan.

⁸ Ipinamatay niya ti manga anak panganay lalaki manga taga Ihiptu ag hanggan ti manga panganay nida manga hayup.

⁹ Ati sa Ihiptu, nagbuwat siya manga makadululaw hanggan lilingutan pag manga bagay agud parusahan ti hari Ihiptu ag ti tanan may kangaranan.

¹⁰ Ipinadamhak niya ti mayamu pag manga nasyun ag minatay niya ti makapangyarihan pag manga hari --

¹¹ sida ni Sihun hari manga Amuriyu, ni Ug hari sa Basan, ag ti tanan pag hari sa Kanaan.

¹² Bag-u ipinakaun kanda daga sa kay nasakupan manga Israilita hampay kanda apuun.

¹³ Panginuun, kanmu ngaran ag kabantugan alalahanun tugka aban.

¹⁴ Dahil pagpatutuuhanan nimu, Panginuun, unman may kasalanan kanmu nasakupan imaw ti kanmu manga manugsirbi, ag kaawaan nimu sida.

¹⁵ Ti manga diyus-diyusan iba manga nasyun binwat lang waydi tawu ginan sa pilak ag gintu.

¹⁶ May manga bibig inda, dapat unman makabagaw, may manga mata, dapat unman makakit,

¹⁷ may manga tuli, dapat unman makadnug, ag unman inda mag-arup.

¹⁸ Ti manga magbuwat inda pag manga diyus-diyusan ag ti tanan pag magsarig sa kanda bumaliw parihu diman sa kanda pag unman may pulus.

^19-20 Kamu pag nasakupan Israil, hanggan kamu pag manga lahi ni Aarun ag iba waya pag manga lahi ni Libi, dayawa niyu ti Panginuun! Kamu pag maggalang sa Panginuun, dayawa niyu siya!

²¹ Dayawa ti Panginuun asan sa Siun, ti banwa Hirusalim kay ulian. Dayawa ti Panginuun!