Kanta 133 - Hanunuu

Kanta 133 Ti Pagmirinsanan may Pagkarausa

Ti kanta habang magsaka, kay isinurat ni Dabid.

¹ Ga kabitay yi kaayad bantayun nu ti nasakupan Diyus magkabuhi may pagkarausa.

² Parihu inda sa mahalaga pag lana ulibu ibinuhus sa ulu ni Aarun ag nagbulus sa kay bangas tugka sa kuwilyu niya rutay.

³ Ngatay parihu inda sa tun-ug sa bantud Hirmun nagras-ug sa manga bantud Siun. Ag sitay sa Siun nagtaratu ti Panginuun mamakaun papalad, imaw ti buhi unman may katapusan.