Kanta 132 - Hanunuu

Kanta 132 Pagdayaw sa Balay Diyus

Kanta habang magsaka.

¹ Panginuun, danga pagkalimti si Dabid hanggan ti tanan pag manga kakurian kay inagwanta.

² Alalahana kay taratu sa kanmu, Panginuun, ti Makamaskihan pag Diyus ni Hakub. Nagtaratu siya kuntay,

³ “Balaw aku muli ngatay manpahuway

⁴ ngatay maturug

⁵ tugka sa makakit aku ulian para maulian Panginuun, ti Makamaskihan pag Diyus ni Hakub.”

⁶ Pagka ati kami sa Iprata nakadnug kami nu naan ti Kaban Kasunduan, ag nakitan nimi inda sa karatagan Haar.

⁷ Bag-u magkun kami, “Atag kita sa Balay Panginuun, mansamba sa atubangan niya tukawan.”

⁸ Panginuun, pag-atag kawu sa kanmu Balay kaibahan sa Kaban Kasunduan mustara nimu kamaskihan.

⁹ Mana mangabuhi pirmi may matadlung kanmu manga manughandug ag manganta sa kabayaan kanmu tapat pag nasakupan.

¹⁰ Dahil sa kan Dabid sa kanmu manugsirbi, danga pagbugyahi kanmu pinili pag hari.

¹¹ Nagtaratu kawu kaybi kan Dabid, ag pihu tupadun nimu ag balaw bawiun. Magkun kawu: “Ti usa sa kanmu manga linahi paublusun niku sa kanmu bilang hari.

¹² Nu tupadun nimu manga linahi manga hari kang kasunduan hanggan ti manga tudlu niku itinudlu sa kanda, kanda manga linahi humari diman tugka aban.”

¹³ Tutuu pinili Panginuun ti Siun kay ulian. Magkun siya,

¹⁴ “Imaw inda ti kang ulian tugka aban; sitay aku mangulian dahil hinangad niku inda.

¹⁵ Pakan-an niku ti Siun sa tanan niya pag pangailangan, ag una kay manga nasakupan pag manga pugri busgun niku karan-unun.

¹⁶ Pirmi niku iribri kay manga manughandug Balay Diyus, ag kay matinupadun pag manga nasakupan manganta pirmi sa kabayaan.

¹⁷ Ipahari niku sa Siun ti hari ginan sa linahi ni Dabid, ag buwatun niku siya ga sulul-an maggiya sa manga tawu.

¹⁸ Pakay-ahun niku kay manga kalaban, dapat paalwanun niku kay kaharian.”