Kanta 128 - Hanunuu

Kanta 128 Ti Bayad sa Pagsunud sa Panginuun

Ti kanta habang magsaka.

¹ Mapalad kamu pag manga maggalang sa Panginuun, magkabuhi sa kay manga sugu.

² Kanyu manga binudlayan kumang-ud sa kanyu manga pangailangan; bumaliw masulung kamu ag may kaabundahan.

³ Kanyu asawa mag-uli sa kanyu manga balay bumaliw parihu sa maraburak pag ubas, kanyu manga anak mantiripun sa sangput niyu manga lamisa parihu sa sugbuk manga kayu ulibu.

⁴ Parihu siyun papaladan ti manga tawu maggalang sa Panginuun.

⁵ Mana papaladan kamu Panginuun ginan sa Siun, ti banwa Hirusalim. Mana makitan niyu mag-abunda inda pag banwa habang magkabuhi kamu.

⁶ Ag mana makitan niyu kanyu manga kaumputan. Mana mayad ti kahamtangan Israil!