Kanta 122 - Hanunuu

Kanta 122 Darangin para sa Hirusalim

Ti kanta habang magsaka, kay isinurat ni Dabid.

¹ Nagbaya aku pagka sinabihan aku kuntay, “Atabug kita sa Balay Diyus Panginuun.”

² Ag kainda, inda yi kami matindugan sa manga sabian Hirusalim.

³ Ti Hirusalim usa ka daka pag banwa ipinatindug marinu ag marig-un.

⁴ Sitay pag mag-atag ti manga linahi Israil hampay dayawun ti Panginuun angay sa kay itinudlu sa kanda.

⁵ Sitaay sa Hirusalim ti hurusayan manga hari sa Israil kay linahi ni Dabid.

⁶ Pagdarangin kamu para sa mayad pag kahamtangan sa Hirusalim sa panab-anan pagsabi, “Mana ngani ti magmahal sa inda pag banwa umalwan.

⁷ Mana ngani may kahusayan ag mayad ti kahamtangan sa sulud Hirusalim ag sa mabisug pag manga bahagi siyun.”

⁸ Hampay sa ikamayad niku manga katawuhan ag manga kakilala, magkumun aku, “Mana ngani pag mayad lang ti kahamtangan Hirusalim.”

⁹ Hampay sa ikamayad Balay Diyus Panginuun kanta Diyus, magdarangin aku hampay umabunda ti Hirusalim.