Kanta 12 - Hanunuu

Kanta 12 Darangin hampay Awatan Panginuun

Kanta ni Dabid para sa manugpanguna sa magkanta. Gamita ti pamatunug may walu ka bakyang.

¹ Panginuun, awati aku, dahil unman yi may nasawad maka-diyus hanggan masarigan.

² Harus ti tanan magpudil sa kanda kaparihu. Pagpaumangun nida ti iba hampay madaya.

³ Panginuun, mana paapasun yi nimu ti palabi-labihun hanggan ti marapaumang.

⁴ Magkun sida, “Sa panab-anan nimi manga baragawun manalu kami. Pagustu kami una hintay kanmi bagawun, unman may makaampara sa kanmi.”

⁵ Magkun ti Panginuun, “Awatan niku ti manga pugri dahil pag-api-apihun sida ag mag-arunghung sida sa agwanta. Alagaan niku sida dahil inda kanda pagkaibgan.”

⁶ Masarigan gid ti manga taratu Panginuun. Parihu inda sa lunsay gid pag pilak ipinalakaw sa apuy makapitu ka ulit.

⁷ Panginuun, alagai kami pirmi, ag pakarayuan kami sa manga daut pag tawu sa tanan pag udas.

⁸ Dahil una naan mag-akitan ti manga daut pag tawu ag pagbayaun waya manga tawu ti kadautan.