Kanta 119 - Hanunuu

Kanta 119 Ti Kasuguan Diyus

¹ Mapalad ti manga tawu unman may ikasabi sa kanda buhi, magkabuhi angay sa kasuguan Panginuun.

² Mapalad ti manga tawu magsunud sa manga kasuguan Diyus, magsunud sa kanya sa kanda buu tagipusuun.

³ Unman sida magbuwat daut nu unman magsunud sida sa manga kagustuhan Diyus.

⁴ Panginuun, ipinakaun nimu sa kanmi ti kanmu manga surundanun hampay tupadun nimi inda may katapatan.

⁵ Daka gid kang gustu bumaliw matinupadun aku sa pagsunud sa kanmu manga surundanun.

⁶ Nu tupadun niku ti tanan nimu manga sugu, balaw aku mangay-a.

⁷ Dayawun niku kawu may malumpiyu pag tagipusuun habang pag-adalan niku kanmu matadlung pag manga sugu.

⁸ Tupadun niku kanmu manga surundanun, nakan ngani danga gid aku pagpabay-ani.

⁹ Unu lugud ti buwatun sa usa ka kalay-awan hampay bumaliw malumpiyu kay buhi? Ti kay buwatun imaw ti pagsunud sa kanmu bagaw.

¹⁰ Magdangup aku sa kanmu sa buu niku tagipusuun, nakan danga pag-ipahintulut patlikudan niku kanmu manga sugu.

¹¹ Pag-alagaan niku kanmu bagaw sa kang tagipusuun hampay balaw aku magkasala sa kanmu.

¹² Dayawun kawu, Panginuun! Tudlui aku kanmu manga surundanun.

¹³ Pagpaka-ulit-ulitun niku pagbagawun ti tanan pag sugu kanmu ipinakaun.

¹⁴ Magbaya aku sa pagsunud sa kanmu manga kasuguan, subra waya sa kabayaan pag-ipakaun kasiyunan.

¹⁵ Pag-isip-isipun niku kanmu manga surundanun; pag-isip-isipun niku mayad kanmu manga tudlu.

¹⁶ Magbaya aku sa kanmu manga surundanun ag balaw niku pagkalimtan kanmu bagaw.

¹⁷ Pagmayad kawu sa kangku bilang kanmu manugsirbi hampay parargu aku magkabuhi ag magsunud sa kanmu bagaw.

¹⁸ Bukasi kang kaisipan hampay maintindihan niku ti marinu pag manga katutuuhanan sa kanmu kasuguan.

¹⁹ Maglawuy lang aku sa inda pag kalibutan, nakan tultulan sa kangku kanmu manga sugu.

²⁰ Sa tanan pag udas maghinaum gid aku sa pag-alam sa kanmu manga sugu.

²¹ Pagtamyawun nimu ti manga marapadayaw ag pagsaadan ti manga magbugya sa kasuguan.

²² Pakarayuan aku sa kanda magpakay-a ag pagpuya, dahil pagtupadun niku kanmu manga tudlu.

²³ Una waya magtipun ti manga manugpanguna sa paglibak sa kangku, aku ti kanmu manugsirbi mag-isip-isip sa kanmu manga surundanun.

²⁴ Kanmu manga tudlu imaw ti magpakaun kabayaan sa kangku; imaw inda ti magpatigayun sa kangku.

²⁵ Bilang ga mamatay yi aku, nakan pararguhan kang buhi angay sa kanmu taratu.

²⁶ Itinultul niku sa kanmu ti tungkul sa kang magpangabuhi ag pinatingihan nimu aku. Tudluan sa kangku kanmu manga surundanun.

²⁷ Pasalman sa kangku kanmu manga surundanun hampay isip-isipun niku kanmu makadululaw manga binwat.

²⁸ Bilang ga maglumuy aku sa karukuan, nakan ngani pabaskuga aku angay sa kanmu taratu.

²⁹ Awati aku hampay balaw bumuwat daut; ag kaawai aku hampay maalaman niku kanmu kasuguan.

³⁰ Pinili niku ti matadlung pag dalan; gustu gid niku sumunud sa kanmu manga sugu.

³¹ Pagsundun gid niku, Panginuun, ti kanmu manga itinudlu, nakan ngani danga pagpahintuluti mangay-a aku.

³² Paghingbutun gid niku sumunud sa kanmu manga sugu dahil pagdugangan nimu kang pan-intindi.

³³ Tudlui aku, Panginuun, kanmu manga surundanun, ag sundun niku inda tugka aban.

³⁴ Ayawi aku pan-intindi sa kanmu kasuguan, ag sundun niku inda ag alagaan sa buu niku tagipusuun.

³⁵ Giyahi aku sa pagsunud sa kanmu manga sugu, dahil sa inda may kabayaan aku.

³⁶ Pagmaraibgun aku sa pagsunud sa kanmu manga tudlu kaysa maghingbut yumaman.

³⁷ Pakarayuan aku sa maghingbut sa manga bagay unman may pulus. Bag-uha nimu kang buhi angay sa kanmu taratu.

³⁸ Tupada kanmu taratu sa kangku, sa kanmu manugsirbi, ti pag-itaratu nimu sa manga maggalang sa kanmu.

³⁹ Bul-a ti manga magpakay-a sa kangku imaw kang pagkadalaan dahil mayad kanmu manga sugu.

⁴⁰ Gustu niku magsunud sa kanmu manga surundanun. Dahil kawu matadlung, bag-uha nimu kang buhi.

⁴¹ Panginuun, pakakitan kanmu pagmahal ag pagribri sa kangku, angay sa kanmu taratu.

⁴² Bag-u masagut niku ti manga magpakay-a sa kangku, dahil magsarig aku sa kanmu manga bagaw.

⁴³ Pabagawa aku sa kanmu tutuu pag manga bagaw sa tanan pag udas, dahil ti kang pag-asa asan lang sa kanmu manga sugu.

⁴⁴ Pirmi niku tupadun kanmu kasuguan tugka aban.

⁴⁵ Mangabuhi aku may kahusayan, dahil maghingbut gid aku sa pagsunud sa kanmu surundanun.

⁴⁶ Unman aku mangay-a mamagaw kanmu manga tultulanun una waya sa manga hari.

⁴⁷ Magbaya gid aku sa pagsunud sa kanmu manga sugu kang pagmahalun.

⁴⁸ Pag-igalang niku kanmu manga sugu, imaw kang pagmahalun, ag pag-isip-isipun gid niku kanmu manga surundanun.

⁴⁹ Alalahana kanmu taratu sa kangku, sa kanmu manugsirbi, dahil inda ti magpakaun sa kangku pagsarig.

⁵⁰ Kanmu taratu magbuhi sa kangku ag magpakaun sa kangku kabayaan sa kang manga pag-agwanta.

⁵¹ Masyadu gid ti pagpakay-a sa kangku manga palabi-labihun, dapat unman aku magpablag sa kanmu kasuguan.

⁵² Panginuun, pag-alalahanun niku kanmu manga sugu dugay yi nimu pag ipinakaun, dahil magpakaun inda sa kangku kabayaan.

⁵³ Galit gid aku masyadu dahil sa manga daut, pag magbugya sa kanmu kasuguan.

⁵⁴ Magkanta aku tungkul sa kanmu manga surundanun una naan aku mag-uli.

⁵⁵ Panginuun, sa yabi pag-alalahanun niku kawu hanggan kanmu kasuguan, nu kabitay niku inda matupad.

⁵⁶ Imaw inda ti kang kabayaan: ti pagsunud sa kanmu manga surundanun.

⁵⁷ Kawu lang gid Panginuun ti kang kailangan. Magtaratu aku sa pagsunud sa kanmu manga bagaw.

⁵⁸ Maghanap aku sa kanmu sa buu niku tagipusuun hampay kaawaan nimu aku angay sa kanmu taratu.

⁵⁹ Pag-isip-isipun niku nu kabitay aku nagkabuhi, ag nagdisisyun aku sumunud sa kanmu manga tudlu.

⁶⁰ Pagtupadun niku madali kanmu manga sugu.

⁶¹ Una waya paggapusun aku manga daut, balaw gid niku pagkalimtan kanmu kasuguan.

⁶² Una waya sa karaw-an yabi mag-imata aku sa pagpasalamat sa kanmu dahil sa kanmu matadlung pag manga sugu.

⁶³ Kakilala aku tanan maggalang sa kanmu ag magsunud sa kanmu manga surundanun.

⁶⁴ Panginuun, pagmahalun nimu ti tanan pag tawu sa kalibutan. Tudlui aku kanmu manga surundanun.

⁶⁵ Panginuun, pagmayad kawu sa kangku, ti kanmu manugsirbi, angay sa kanmu taratu.

⁶⁶ Ayawi aku kadunungan ag naalaman dahil magsarig aku sa kanmu manga sugu.

⁶⁷ Sa kabag-u, sa unman waya nimu aku pagparusahan, magpakarayu aku sa kanmu, dapat kainda pagtupadun yi niku kanmu bagaw.

⁶⁸ Mayad gid kawu ag mayad kanmu manga pagbuwatun. Tudlui aku nimu manga surundanun.

⁶⁹ Una pagsiraan aku manga marapadayaw, pagtupadun di gid niku kanmu manga surundanun sa buu niku tagipusuun.

⁷⁰ Inda pag manga marapadayaw unman may pan-intindi sa kanmu kasuguan, dapat aku magbaya sa pagsunud sa inda.

⁷¹ Mayad pinarusahan nimu aku, dahil sa panab-anan inda nakaalam aku sa kanmu manga tudlu.

⁷² Para sa kangku, ti kasuguan kanmu ipinakaun mas mahalaga waya sa mayamu gid pag kayamanan.

⁷³ Linalang nimu aku ag hinistuda; ayawi aku pag-intindi hampay makaalam aku sa kanmu manga sugu.

⁷⁴ Makabaya ti manga maggalang sa kanmu nu makitan nida aku, dahil magsarig aku sa kanmu bagaw.

⁷⁵ Alam niku, Panginuun, matadlung kanmu manga sugu. Ag dahil tapat kawu, binunggud nimu aku.

⁷⁶ Pabaskuga aku sa kanmu pagmahal angay sa kanmu taratu sa kangku, sa kanmu manugsirbi.

⁷⁷ Kaawai aku hampay parargu aku mangabuhi; dahil magbaya aku sa pagsunud sa kanmu kasuguan.

⁷⁸ Mana mangay-a ti manga marapadayaw dahil pagbangdanan nida aku. Nu sa kangku, mag-isip-isip aku sa kanmu manga surundanun.

⁷⁹ Mana pagpakarani sa kangku ti manga magsunud sa kanmu ag nakaalam sa kanmu manga tudlu.

⁸⁰ Mana tupadun niku sa buu niku tagipusuun kanmu manga surundanun hampay balaw aku mangay-a.

⁸¹ Magkagasa yi aku mag-alagad sa kanmu pagribri sa kangku, dapat magsarig aku sa kanmu bagaw.

⁸² Magpandulum yi kang pamantay sa magpakaalagad sa kanmu taratu. Magpaingana aku, “Kapira waya lugud nimu aku pag pabaskugun ag kaawaan?”

⁸³ Una waya parihu yi aku sa unman yi pag lukub mapakinabangan palaulian intus, unman niku pagkalimtan kanmu manga surundanun.

⁸⁴ Tugka waya lugud kapira aku pag mangalagad? Kapira waya lugud nimu parusahan ti manga mag-unuunu sa kangku, sa kanmu manugsirbi?

⁸⁵ Nagkali manga ukang sa pagsuduk sa kangku ti manga marapadayaw imaw ti balaw magsunud sa kanmu kasuguan.

⁸⁶ Masarigan gid ti tanan nimu pag manga sugu. Awati aku, dahil paghingabtun aku manga tawu una unman may kadahilanan.

⁸⁷ Diit wadi aku nida matyun, dapat balaw niku binugyahan kanmu manga surundanun.

⁸⁸ Alagai nimu kang buhi angay sa kanmu pagmahal; tupadun niku ti ipinakaun nimu pag tudlu.

⁸⁹ Panginuun, kanmu bagaw pumarargu sa unman may katapusan; marig-un inda parihu sa langit.

⁹⁰ Kanmu katapatan ud may katapusan hanggan waya aban. Ibinugtang nimu marig-un ti kalibutan, nakan matayak di inda.

⁹¹ Ti tanan bagay matayak di tugka taynguna dahil sa kanmu kagustuhan. Dahil inda sida magsunud sa kanmu.

⁹² Nu kanmu kasuguan unman magpasulung sa kangku, namatay yi mana aku dahil sa kang pag-agwanta.

⁹³ Balaw gid niku kalimtan kanmu manga surundanun, dahil sa panab-anan inda pag-iparargu nimu kang buhi.

⁹⁴ Kanmu aku, nakan ribrihan aku! Dahil maghingabut gid aku sumunud sa kanmu manga tudlu.

⁹⁵ Mag-alagad ti manga daut pag tawu agud matyun aku, dapat pag-isipun niku kanmu manga tudlu.

⁹⁶ Nakitan niku ti tanan maaw pag bagay may katugkaan, dapat kanmu manga sugu parargu tugka aban.

⁹⁷ Pagmahalun gid niku kanmu kasuguan. Pag-isip-isipun gid niku inda pirmi.

⁹⁸ Ag dahil pirmi sa kangku kanmu manga sugu, mas may alam aku kaysa kang manga kalaban.

⁹⁹ Mayamu waya kang naintindihan kaysa kang manga manugtudlu, dahil kanmu tudlu imaw kang pag-isip-isipun.

¹⁰⁰ Mas mayamu waya kang magkaintindihan kaysa manga gurangun, dahil pagtupadun niku kanmu manga surundanun.

¹⁰¹ Pag amanan niku ti tanan daut pag-uugali hampay matupad niku kanmu bagaw.

¹⁰² Unman aku magsimray sa kanmu manga sugu, dahil kawu ti magtudlu sa kangku.

¹⁰³ Bilang ga hintay yi kay katagsing kanmu manga bagaw, mas matagsing waya inda kaysa daykut.

¹⁰⁴ Sa panab-anan nimu manga surundanun, maglawak kang pan-intindi, nakan pagkadat-an niku ti tanan daut buwat.

¹⁰⁵ Kanmu bagaw parihu sa sulu magpakaun rayaw sa kang lakawan.

¹⁰⁶ Tupadun gid niku kang itinaratu sumunud sa kanmu matadlung pag manga sugu.

¹⁰⁷ Masyadu gid kang pag-agwanta; pararguhan kang buhi, Panginuun, angay sa kanmu taratu.

¹⁰⁸ Tanggapa, Panginuun, kang buluntad pagdayaw sa kanmu, ag tudlui aku kanmu manga sugu.

¹⁰⁹ Una waya asan aku pirmi sa alangan pag kamatayan, unman gid niku pagkalimtan kanmu kasuguan. dapat balaw aku namugya sa kanmu manga surundanun.

¹¹⁰ Nagpauli suduk para sa kangku ti manga daut pag tawu, dapat balaw aku nagpablag sa kanmu manga surundanun.

¹¹¹ Kanmu manga tudlu imaw ti mahalaga niku pag kasiyunan sa unman may katapusan, dahil imaw inda kang kabayaan.

¹¹² Nagdisisyun aku tupadun gid niku ti kanmu manga surundanun tugka aban.

¹¹³ Pagkadat-an niku ti manga tawu balaw matinupadun sa kanmu, dapat pagmahalun niku kanmu kasuguan.

¹¹⁴ Kawu kang panangga ag manug-alaga; magsarig aku sa kanmu bagaw.

¹¹⁵ Pagpakarayu kamu sa kangku, kamu pag manga magbuwat daut, hampay matupad niku ti manga sugu niku Diyus.

¹¹⁶ Ayawi aku kabisugan angay sa kanmu taratu hampay parargu aku mangabuhi; ag danga pagpahintuluti mabuyu aku sa kang pagsarig sa kanmu.

¹¹⁷ Awati aku hampay makaribri; ag hampay pirmi niku ituun kang kaisipan sa kanmu manga surundanun.

¹¹⁸ Pagbugyahan nimu ti tanan magsimray sa kanmu manga surundanun. Sa tutuu, kanda magpanluku unman may pulus.

¹¹⁹ Pag-isipun nimu parihu sa panguyangan ti daut pag manga tawu sitay sa kalibutan. Dahil sa katida pagmahalun niku kanmu tudlu.

¹²⁰ Pagtakigan aku sa paggalang sa kanmu; magkadala gid aku sa kanmu pagsintinsiya.

¹²¹ Binwat niku ti matadlung ag hustu, nakan danga aku pagpabay-ani sa kang manga kalaban.

¹²² Pagtaratu kawu kuntay awatan nimu aku, kanmu manugsirbi; danga pagpahintuluti apihun aku manga marapadayaw.

¹²³ Magpandulum yi kang pamantay sa pakaalagad sa kanmu taratu hampay iribri nimu aku.

¹²⁴ Buwata sa kangku, sa kanmu manugsirbi, ti angay sa kanmu pag pagmahal, ag tudlui aku kanmu manga surundanun.

¹²⁵ Manugsirbi nimu aku, nakan ayawi aku nimu pan-intindi hampay maintindihan niku kanmu manga pag-itudlu.

¹²⁶ Panginuun, udas yi inda hampay tumandug kawu, dahil paglabagun manga tawu kanmu kasuguan.

¹²⁷ Dahil pagmahalun niku kanmu manga sugu higit waya sa gintu, una waya pinakalunsay pag gintu,

¹²⁸ ag dahil pagsundun niku ti tanan nimu surundanun, pagkadat-an niku ti tanan daut pag buwat.

¹²⁹ Mayad gid kanmu manga tudlu, nakan pagsundun niku inda sa buu niku tagipusuun.

¹³⁰ Ti pagtultul kanmu manga bagaw magpakaun rayaw sa kaisipan manga tawu ag kadunungan sa manga unman may alam.

¹³¹ Masyadu gid kang magkaibug sa kanmu manga sugu.

¹³² Pakidnugi aku ag kaawai, parihu sa kanmu pagbuwatun pirmi sa manga magmahal sa kanmu.

¹³³ Giyahi aku sa panab-anan nimu manga bagaw; danga humari ulian aku kadautan.

¹³⁴ Ribrihan aku sa manga mag-api sa kangku hampay matupad niku kanmu manga surundanun.

¹³⁵ Ipakakit nimu kanmu pangaawa sa kangku, sa kanmu manugsirbi, ag tudlui aku kanmu manga surundanun.

¹³⁶ Masyadu gid kang maglumi dahil unman pagsundun manga tawu kanmu kasuguan.

¹³⁷ Matadlung kawu, Panginuun, ag tama gid kanmu manga sugu.

¹³⁸ Matadlung ag masarigan gid ti ipinakaun nimu pag manga tudlu.

¹³⁹ Masyadu gid kang pangagalit dahil pagbugyahan niku manga kalaban kanmu manga bagaw.

¹⁴⁰ Napatutuuhanan masarigan gid kanmu taratu, nakan mahalaga inda sa kangku, sa kanmu manugsirbi.

¹⁴¹ Una makuri aku ag pagdayuun, unman niku pagkalimtan kanmu manga surundanun.

¹⁴² Unman may katapusan kanmu pagkamatadlung ag tutuu kanmu kasuguan.

¹⁴³ Nagras-ug sa kangku ti kakurian ag kabuyatan, dapat kanmu manga sugu nagpakaun sa kangku kabayaan.

¹⁴⁴ Matadlung kanmu manga tudlu sa unman may katapusan. Ayawi aku pag-intindi sa kanmu manga tudlu hampay parargu aku magkabuhi.

¹⁴⁵ Magtawag aku sa kanmu, Panginuun, sa buu niku tagipusuun; saguta aku, ag sundun niku kanmu manga surundanun.

¹⁴⁶ Magtawag aku sa kanmu; ribrihan aku, ag sundun niku ti kanmu manga surundanun.

¹⁴⁷ Mag-ipulaw aku sa unman waya magsinggit ti init ag maghagad aku awat sa kanmu. Magsarig aku sa kanmu taratu.

¹⁴⁸ Mapulawan aku sa buu yabi, pag-isip-isipun niku kanmu manga taratu.

¹⁴⁹ Panginuun, patingihi aku angay sa kanmu pagmahal; pararguhan kang buhi angay sa kanmu sugu.

¹⁵⁰ Magpakarani sa kangku ti manga daut pag tawu maghingabut sa kangku, imaw ti magbugya sa kanmu kasuguan.

¹⁵¹ Dapat arani kawu sa kangku, Panginuun; ag masarigan ti tanan nimu pag manga sugu.

¹⁵² Sa kang pag-adal sa kanmu manga tudlu, dugay yi pagnaalaman niku inda kanmu manga pag-itudlu binwat nimu hampay magparargu sa unman may katapusan.

¹⁵³ Bantayi nimu kang mag-agwanta ag ribrihan aku, dahil unman niku kinalimtan kanmu kasuguan.

¹⁵⁴ Baliwahi aku sa manga magbangdan sa kangku ag ribrihan aku; pararguhan kang buhi angay sa kanmu taratu.

¹⁵⁵ Unman makaribri ti manga daut pag tawu, dahil balaw nida pag-isabuhi kanmu manga surundanun.

¹⁵⁶ Daka kanmu pangaawa, Panginuun; pararguhan kang buhi angay sa kanmu sugu.

¹⁵⁷ Mayamu pag manga kalaban ti maghingabut sa kangku, dapat unman gid aku nagpakarayu sa kanmu manga tudlu.

¹⁵⁸ Pagkadat-an niku ti manga balaw matinupadun sa kanmu, dahil balaw nida pagsundun kanmu bagaw.

¹⁵⁹ Bantayi, Panginuun, nu kabitay kang pagmahal sa kanmu manga surundanun. Pararguhan kang buhi angay sa kanmu pagmahal.

¹⁶⁰ Tutuu ti tanan nimu bagaw, ag unman may katugkaan ti tanan nimu matadlung pag manga sugu.

¹⁶¹ Paghingabtun aku manga manugpanguna una balaw may kadahilanan, dapat kang tagipusuun maggalang gid sa kanmu bagaw.

¹⁶² Magbaya aku sa kanmu taratu parihu sa usa ka tawu nakakit daka pag kayamanan.

¹⁶³ Pagkadat-an niku ag pagkagalitan ti kapudilan, dapat pagmahalun niku kanmu kasuguan.

¹⁶⁴ Makapira aku ka bisis magdayaw sa kanmu sa usa ka sirang, dahil sa kanmu matadlung pag manga sugu.

¹⁶⁵ Makatanggap gid mayad pag kahamtangan ti manga magmahal sa kanmu kasuguan, ag unman may makapadamhak sa kanda.

¹⁶⁶ Panginuun, magsarig aku kuntay kanmu aku iribri, ag magsunud aku sa kanmu manga sugu.

¹⁶⁷ Daka gid kang pagmahal sa kanmu manga tudlu, nakan pagtupadun gid niku inda.

¹⁶⁸ Alam nimu ti tanan niku pag buwatun, nakan pagtupadun niku kanmu manga surundanun ag manga pag-itudlu.

¹⁶⁹ Panginuun, mana patingihan nimu kang magpaawat sa kanmu. Ayawi aku pan-intindi angay sa kanmu taratu.

¹⁷⁰ Mana patingihan nimu kang darangin. Ribrihan aku angay sa kanmu taratu.

¹⁷¹ Mandayaw aku pirmi sa kanmu, dahil pagtudluan nimu aku kanmu manga surundanun.

¹⁷² Manganta aku tungkul sa kanmu bagaw, dahil matadlung ti tanan nimu manga sugu.

¹⁷³ Mana alistu kawu pirmi sa pag-awat sa kangku, dahil pinili niku ti pagsunud sa kanmu manga surundanun.

¹⁷⁴ Panginuun, mag-isip aku iribri nimu aku. Kanmu kasuguan magpakaun sa kangku kasulungan.

¹⁷⁵ Pararguhan kang buhi hampay madayaw niku kawu, ag mana mangawat sa kangku kanmu manga sugu.

¹⁷⁶ Tinmalang aku parihu sa nadura karanidu, nakan hanapa aku, kanmu manugsirbi, dahil unman niku pagkalimtan kanmu manga sugu.