Kanta 118 - Hanunuu

Kanta 118 Pagpasalamat dahil sa Magpanalu

¹ Pasalamati ti Panginuun, dahil mayad siya; kay pagmahal unman may katapusan.

² Sumabi ti nasakupan Israil, “Kay pagmahal unman may katapusan.”

³ Sumabi ti manga lahi ni Aarun, “Kay pagmahal unman may katapusan.”

⁴ Sumabi ti manga maggalang sa Panginuun, “Kay pagmahal unman may katapusan.”

⁵ Sa kang kakurian, nagdangup aku sa Panginuun, ag sinagut niya aku sa panab-anan pagribri sa kangku.

⁶ Kaibahan niku ti Panginuun, nakan unman aku magkadala. Unu ti mabuwat tawu sa kangku?

⁷ Kaibahan niku ti Panginuun. Siya ti mag-awat sa kangku, ag makitan gid ngap niku ti pagkatalu niku manga kalaban.

⁸ Mas mayad waya mandangup sa Panginuun kaysa magsarig sa tawu.

⁹ Mas mayad waya mandangup sa Panginuun kaysa magsarig sa masarigan pag manga tawu.

¹⁰ Pinalibutan aku mayamu manga nasyun imaw ti kang kalaban, dapat tinalu niku sida sa panab-anan kamaskihan Panginuun.

¹¹ Tutuu pinalibutan nida aku, dapat tinalu niku sida sa panab-anan kamaskihan Panginuun.

¹² Ginira nida aku parihu sa kadamlan putyukan, dapat rargu naampara sida parihu sa magkairub dayami. Tinalu niku sida sa panab-anan kamaskihan Panginuun.

¹³ Ginira nida aku mabaskug ag diit wadi sida manalu, dapat inawatan aku Panginuun.

¹⁴ Ti Panginuun imaw ti magpakaun sa kangku kabisugan ag siya ti kang pagkantahun. Siya ti nagribri sa kangku.

^15-16 Patingihi ti huruyawan nasakupan Diyus sa kanda manga turda dahil sa kanda panalu: “Inda pag panalu binwat Panginuun sa panab-anan niya kamaskihan! Ti kamaskihan Panginuun imaw ti nagpanalu sa kanta!”

¹⁷ Balaw aku mamatay, nu unman magkabuhi, ag itultul niku ti manga binwat Panginuun.

¹⁸ Una waya ngani masyadu gid ti parusa Panginuun sa kangku, unman niya pagpahintulutan mamatay aku.

¹⁹ Bukasi ti manga sabian Balay Diyus Panginuun para sa kangku, dahil sumaka aku ag manpasalamat sa Panginuun.

²⁰ Imaw inda ti sabian Panginuun nu naan ti manga matadlung wata ti makasaka.

²¹ Panginuun, manpasalamat aku sa kanmu, dahil sinagut nimu kang darangin. Kawu ti nagribri sa kangku.

²² Ti dinayu manugpatindug balay pag batu imaw ngap ti nagbaliw patakinan pag batu.

²³ Ti Panginuun ti nagbuwat inda ag makadululaw inda sa kanta magbantay.

²⁴ Inda pag sirang ti pagpanalu Panginuun, nakan ngani pagbaya kita ag dayawun siya.

²⁵ Panginuun, parargu kawu magribri sa kanmi. Ayawi kami panalu sa kanmi manga pagbuwatun.

²⁶ Mapalad ti manga magras-ug sa ngaran Panginuun. Kamu pag manga tawu, mana papaladan diman kamu Panginuun ginan sa kay Balay.

²⁷ Ti Panginuun, Diyus; ag mayad gid siya sa kanta. Magdara kita manga sanga kayu sa pagdaus pista, ag manangput kita sa harandugan.

²⁸ Panginuun, kawu kang Diyus; magpasalamat aku ag magdayaw sa kanmu.

²⁹ Pasalamati ti Panginuun, dahil mayad siya; kay pagmahal unman may katapusan.