Kanta 116 - Hanunuu

Kanta 116 Ti Diyus Magribri sa Tawu sa Kamatayan

¹ Pagmahalun niku ti Panginuun, dahil pagpatingihan niya kang maghagad awat sa kanya.

² Dahil sa pagpatingihan niya aku, unman aku umapas sa magtawag sa kanya habang magkabuhi aku.

³ Magkadala aku dahil magkaramdaman niku bilang ga madali yi aku mamatay; ti kamatayan bilang ga sa lubid magpasabud sa kangku. Nabung-anan gid aku ag nadala,

⁴ nakan nagdangup aku sa Panginuun, “Panginuun, ribrihan aku!”

⁵ Ti Panginuun nita Diyus mayad, matadlung, ag maawaun.

⁶ Pag-alagaan niya ti manga balaw may alam. Pagka unman aku may nabwat irinibri niya aku.

⁷ Kailangan magpakarig-un aku dahil mayad gid ti Panginuun sa kangku,

⁸ dahil irinibri niya aku sa kamatayan, sa karukuan ag sa kadamhakan.

⁹ Nakan mangabuhi aku arani sa Panginuun sitay sa kalibutan manga buhi.

¹⁰ Magsarig di aku, una waya magkun aku, “Masyadu gid kang pag-agwanta.”

¹¹ Sa kang kadalaan nagsabi aku, “Unman gid may tawu masarigan.”

¹² Unu lugud ti maibalus niku sa Panginuun sa tanan niya pag kaayadan sa kangku?

¹³ Dumayaw aku sa Panginuun ag mandara aku handug intus sa pagpasalamat sa kanya sa pagribri niya sa kangku.

¹⁴ Tupadun niku kang manga taratu sa kanya sa atubangan tanan niya nasakupan.

¹⁵ Mahalaga sa pamantay Panginuun ti kamatayan niya matinupadun pag nasakupan.

¹⁶ Panginuun, tutuu pag manugsirbi nimu aku. Irinibri nimu aku sa pagkabihag.

¹⁷ Dumayaw aku sa kanmu ag manhandug aku handug bilang pagpasalamat sa kanmu.

¹⁸ Tupadun niku kang manga taratu sa kanmu sa atubangan tanan nimu nasakupan

¹⁹ ati sa sugkadan nimu Balay sa Hirusalim. Dayawun ti Panginuun!