Kanta 115 - Hanunuu

Kanta 115 Usa lang gid ti Tutuu pag Diyus

¹ Panginuun, balaw kami ti kailangan dayawun, nu unman kawu, dahil sa kanmu pagmahal ag katapatan.

² Hayga pagpuyaan kami iba manga nasyun sa panab-anan pagsabi, “Naan yi lugud kanyu Diyus?”

³ Kanmi Diyus asan sa langit ag pagbuwatun niya una hintay kay pagkaibgan.

⁴ Dapat kanda manga diyus-diyusan binwat lang waydi tawu ginan sa pilak ag gintu.

⁵ May manga bibig sida, dapat unman makabagaw; may manga mata, dapat unman makakit.

⁶ May manga tuli, dapat unman makadnug; may manga irung, dapat unman makahungaw.

⁷ May manga kamang, dapat unman makahiyaput; may manga lulud, dapat unman makalakaw, ag una busis unman kawu may masaydan gin sa kanda.

⁸ Ti magbuwat sa katida pag manga diyus-diyusan ag ti tanan pag magsarig sa kanda bumaliw diman ga kanda unman may pulus.

^9-10 Kamu pag nasakupan Israil, hanggan yi kamu pag manga lahi ni Aarun, pagsarig kamu sa Panginuun. Siya ti kanyu manug-awat ag manug-alaga.

¹¹ Kamu pag manga maggalang sa Panginuun, pagsarig kamu sa kanya. Siya ti kanyu manug-awat ag manug-alaga.

¹² Pag-alalahanun kita Panginuun, ag papaladan niya kita. Papaladan niya kay nasakupan Israil hanggan yi ti manga lahi ni Aarun.

¹³ Papaladan niya ti manga maggalang sa kanya, kilala man ngatay unman.

¹⁴ Mana kamu ag ti kanyu manga linahi payamuun Panginuun.

¹⁵ Mana papaladan kamu Panginuun imaw ti naglalang sa kalangitan ag sa kalibutan.

¹⁶ Ti kalangitan sa Panginuun, dapat ti kalibutan iinintirga niya sa manga tawu.

¹⁷ Balaw ti manga namatay ti mandayaw sa Panginuun, dahil balaw yi ngani sida makabagaw,

¹⁸ nu unman kita ti manga buhi imaw ti mandayaw sa kanya kainda ag hanggan waya aban. Dayawun ti Panginuun!