Kanta 114 - Hanunuu

Kanta 114 Manga Kanta tungkul sa Pagluwas manga Israilita sa Ihiptu

¹ Ti manga Israilita kay linahi ni Hakub mag-uli kaybi sa Ihiptu, nu naan tuhay kay pamagaw manga tawu ati.

² Igu linmuwas yi sida sa Ihiptu, binwat Diyus ti Huda bilang kay banal pag rugar, ag pinangunahan niya ti Israil.

³ Ti Marara pag Dagat natunga, ga tawu napalagiw. Ti danum sa Sapa Hurdan ga tawu napausun.

⁴ Nahalu ti manga bantud ga sa magluksu manga kambing ag manga karanidu.

⁵ Hayga nahawi ti Marara pag Dagat ag inmapas sa pagbulus ti Sapa Hurdan?

⁶ Hayga nahalu ti manga bantud bilang ga sa magluksu manga kambing ag manga karanidu?

⁷ Magkatandug ti kalibutan sa atubangan Panginuun, ti Diyus ni Hakub,

⁸ imaw ti nagbuwat maganit pag batu hampay bumaliw tipunan danum ag bumaliw bulbugan magbulus.